PUNTS
la gasetta giuvna

Detagls davart l'ediziun nr. 98

fanadur 2002
annada 9
Randulins
PUNTS nr. 98
Caporedacziun: Conradin Klaiss
Fadrina Hofmann
Rafael Müller
Layout: Lydia Wilhelm
editorial

Randulins – tge? Tge han pers quels en las PUNTS? (David Truttmann)

Randulins – uschia vegnivan numnads il Engiadinais ch’abitavan e faschevan affars a l’ester surtut durant il 19avel tschientaner. Randulins vegnivan els numnads, perquai ch’els turnavan, sco ils utschels migrants, mintga stad en Engiadina per far lur vacanzas. Ed els passentavan la pensiun en lur patria. Anc oz stattan chasunas e palazis a Bever, Schlarigna, Segl, Sent, Zuoz ed en autras vischnancas. Las chasas dals Bonorands, Catanis, Cloettas, Frizzonis, Jennys, Jostys, Orlandis, Schucans, Secchis e da blers auters anc. Ina gronda part dad els eran pastiziers e possedevan cafeterias en l’entira Europa, da la Sicilia en Britannia, da la Frantscha fin en Russia. Schebain che Randulins eran en emprima lingia emigrants ladins, hai era dà Randulins d’auters territoris rumantschs. Bleras Rumantschas e Rumantschs vegnan perquai ad avair "ourasom sün ün mansin" anc in antenat che era emigrà da ses temp.

Randulins – tge ha pers quest tema istoric en ina gasetta da giuvenils sco PUNTS? Dain la resposta radicala cun la dumonda da Leo Tuor en ses nov cudesch "Onna Maria Tumera" (guarda preschentaziun en questa gasetta): "San ins esser schi ureidis e buca vuler vegnir danunder ch’ins vegn?" Damai, l’uman sco fritg da ses passà cun il basegn existenzial da scuvrir quel passà? U declerain noss interess per quest tema simplamain cun: "Back to the roots!"

Nus da PUNTS avain empruvà da transferir il puntissimo "Randulins" en noss temp. Uschia che nus avain interpretà il pled "randulin" vaira libramain, nus l’avain schlargià cun ils pleds "emigrar", "returnar" ed "encreschadetgna". Da tadlar las istorgias ch’ans raquintan ils randulins, ils canarins ed ils auters bels utschels – quai vala en mintga cas la paina.

texts en questa ediziun

David Spinnler (Il disc dal mais: CLÉAN - "MORE OR LESS THE TRUTH”)Pia Valär (L’istorgia d’üna famiglia da randulins)Rafael Camenisch (El vent)Hildegard (L’impussebladad dalla vischinanza desida la nossa existenza)Barbla Etter (Turner)Chatrina Josty ("Jau less vesair blers pajais”)David Truttmann (Da tats, basattas e sfurats)Ursin Lutz (Stephan Eicher - La Rivière)Alexander Casanova (La Chasa-Lenn)Nathalie Demont (Las furias) (Gieri Cagliom)Hildegard versus Clotilda (Igl velo)Valentina Camous (Federico)Rafael Müller ("Va schon adegna lia eir tigl radio”)

turnar a la survista