PUNTS
la gasetta giuvna

Detagls davart l'ediziun nr. 96

matg 2002
annada 8
Mellen
PUNTS nr. 96
Caporedacziun: Conradin Klaiss
Fadrina Hofmann
Rafael Müller
Layout: Lydia Wilhelm
editorial

Intervista cun signura mellen (Conradin Klaiss)

PUNTS: Savessas Vus sa preschentar "curt e bun"?
Mes num è Mellen, jau deriv da la famiglia da las colurs da basa. Mai gudognan ins or dad ocher, terratsch mellen, mineral da plum mellen, puma melna e barium. Mia lunghezza da l’unda è 573 nanometers. Uschia sun jau la terza colur en l’artg visibel per l’egl uman.

Vus essas ina persuna fitg ambivalenta, è quai gist?
Gea. Quai è uschia. Dad ina vart represchent jau l’optimissem, il divertiment, il plaschair da viver, l’amicabladad, ubain simplamain l’adjectiv allegher. Da l’autra vart stun jau per tratgs caracteristics sco scuidanza, schigliusia, ranvaria, egoissem, manzegna e perfin faussadad. Uschia hai jau ina vita fitg turbulenta. Jau sai crudar en ina depressiun brutala che para da mai pli prender ina fin ed alur puspè en ina allegria sco en il settavel tschiel.

Sche Vus dais in sguard en Voss passà, tge temp è sta il pli bel?
Ma, jau crai, il pli bel temp passent jau uss en il temp modern. Jau sun fitg dumandada en la moda da resti, principalmain en ils mais da stad. Las flurs-sulegl èn pli e pli "in", sin tavlas da traffic sun jau savens il numer 1, perquai ch’ins vesa fitg bain mai sin distanza cur che jau sun ensemen cun signura Nair. En il temp medieval er quai auter. Là sun jau vegnida fatga tar ina desertura. Gugent u navidis represchentava jau savens la glieud al ur: las pitaunas, ils eretics, simplamain tut quels che devan ord la norma. Anc en quest tschientaner stuevan ils gidieus cuser ina staila melna vid lur vestgids. Igl è stà in temp sgarschaivel.

Savais Vus declerer, pertge che gist Vus essas vegnida fatga tar ina desertura?
Sco gia menziunà: Mai vesan ins anc bunamain da stgir sin fitg lunga distanza. Quel che porta mai na po betg sa zuppar, jau rend memia blera attenziun. Quantas giadas che jau sun ma turpegiada da puspè tradir insatgi. Ma jau na saveva far nagut encunter.

Tge influenza avais Vus sin ils carstgauns?
Directamain na poss jau betg dir quai. Ma igl è uschia, che carstgauns che han gugent mai èn attents, plain temperament, vitals savens fitg spiertus. Els derasan plaschair da viver, èn plain umor e cunquai ch’els èn il pli da buna luna han els in effect fitg positiv sin auters carstgauns. Quels che na san entschaiver nagut cun mai èn plitost carstgauns che han tema da disdir, che na crain betg en sasez e che pateschan sut complexs da minoritad.

Tge vulais Vus dir als lecturs da PUNTS?
Regalai mai ad insatgi che Vus avais gugent, ed jau regal optimissem e plaschair da viver!

texts en questa ediziun

Pia Valär (In tschercha dal mellan)Barbla Etter (Filosofias melnas)Cindy (Mellen datti dapertut)Roger Nigg (Mellen submarin)Flurina Badell (La vie en jaune)Rafael Müller (Da stgaffas da brevs tgi èn betg mellnas)Fadrina Hofmann (Inscunter)Alberto Palaia (Satira, "fettira”!)Simon Berther (Fanuot) (Naven cun las panuglias!)Andri Derungs (Juhui nus essan uss schuldai!)Clotilda Schmid (La muria da lungatgs)Chatrina Josty (La GiuRu a Grou)Seraina Beeler (Cun u sainza larmas - en rachint) (Nirvana - mia glisch)PUNTS (In misteri e 12 giadas curaschi)Men Caduff (Siegenthaler en mia abitaziun)Dario Klaiss (Malsaun)Hildegard versus Clotilda (Ascensour u stgela?)David Spinnler (Il disc dal mais: Dada Ante Portas - "Bound For Nowhere”)Jonas Meyer (Giugar lotto ed ir en viadi) (Miu bh - has viu el?)

turnar a la survista