PUNTS
la gasetta giuvna

Detagls davart l'ediziun nr. 95

avrigl 2002
annada 8
Urden e dischurden
PUNTS nr. 95
Caporedacziun: Conradin Klaiss
Fadrina Hofmann
Rafael Müller
Layout: Theres Jörger
editorial

Urden è la mesa vita, tschella mesadad consista da dischurden (Fadrina Hofmann)

Igl è puspè uschia vinavant: la primavaira è qua. E quai vul dir en il medem mument - sgarschur - temp per far puspè ina giada urden en stanza. Però far urden enendretg, e betg mo stumplar ils mantuns sut letg en per zuppar il caos che s'ha sviluppà grondiusamain durant l'enviern.

Prest cun malavita schlian ils caots lur ovra da dischurden ch'i han cultivà gia uschè ditg. Tgi pretenda atgnamain ch'umans che sa sentan bain en lur dischurden nun hajan nagin sistem areguard lur uscheditg "puf"? Mintga object ha sa ses lieu amez quest mund senza fund visibel (pratic per glieud che odiescha da far cun il tschitschapulvra) e suenter l'orgia da far urden passent'ins uras tschertgond ses cudesch da poesias, ses pullover preferì u il nov dc da Jovanotti. Tge senn fa en quest cas da rumir?

Il dischurden nun è estetic, din ils amants dal urden. Da tschella vart sa esser caos insatge extrem creativ, quai mussan maschaidas da differents objets, differents materials e differentas culurs che furman mintga giada in purtret tuttafatg nov.

Il dischurden simbolisescha pultrunezza e mancanza da disciplina, aud'ins da pitschen ensi. Tar questa pretaisa pudess ins però er repeter la frasa che mes ami - caot or da passiun - m'ha respundì cur che jau hai puspè ina giada reclamà da ses "regiment" da dischurden: "La glieud che ha adina urden è be memia marscha per tschertgar sia rauba". Aha! Er sche quest statement ha insatge per sai, preferesch jau da betg stuair rampignar sur muntognas da cudeschs, da vestgadira ed anc da bler'autra rauba (per part prest indefinibla) per arrivar la saira en mes letg.

Facit: mintgin duess viver cun ses urden u ses dischurden, basta ch'ins saja fortunà, u betg? Cun questa conclusiun armonica (stil Woodstock '68) vuless jau finir l'editorial e forsa vais Vus, charas lecturas e chars lecturs, survegnì in pau veglia da leger er quai che mes conredacturs e mias conredacturas han reflectà tar ils terms "urden e dischurden". - Bun divertiment!

texts en questa ediziun

Ursin Lutz (Uorden? Denuordis?) – Hildegard versus Clotilda)Clotilda Maier (Igl codesch z 251)Conradin Klaiss (Fom da primavera)Fadrina Hofmann (O solo mio ...)Gian Sgier (La battaglia)Gian Sgier (Dar fuorma)Rafael Müller (Urden e disurden ainten la democrazeia)Pia Valär (Intervista cun Therry Brunner)Rafael Camenisch (Egls)David Spinnler (Disc dal mais: Modena City Ramblers - "Radio Rebelde")Men Caduff (Tunnels)Jonas Meyer (Links dal mais: E.T., alien e dante)Silvio Defuns (Hardwaredome, survetschs dad e-mail)

Datotecas
  • 95.pdf (425.63 KiB)
turnar a la survista