PUNTS
la gasetta giuvna

Detagls davart l'ediziun nr. 94

mars 2002
annada 8
Siemis
PUNTS nr. 94
Caporedacziun: Conradin Klaiss
Fadrina Hofmann
Rafael Müller
Layout: Lydia Wilhelm
editorial

In siemi – gea u na? (David Truttman)

Jau ha ina giada descrit en in da mes texts in siemi. In simpel siemi. Però in lectur ha s’accorschi – cun tutta raschun – che il siemi era mo inventà. E quella persuna ha lura perfin pretendì: "Ti vesas immediat, sche in siemi è propi er in siemi, u sch’el è mo ina inveziun da l’auter." Suenter quella pretensiun er jau natiralmain il dödel. Jau m’aveva outà definitivamein sco banausa da l’interpretaziun da siemis. Vi da quella sconfitta murd jau anc oz. Propi! Perquai less jau gist far ina segunda emprova: Jau offresch a Vus dus siemis. Irreals èn natiralmain tuts dus. Però in da quels hai jau propi siemià. L’auter hai jau inventà en quel mument che jau hai scrit questas pèr lingias. – Damai, ussa essas Vus vidlonder. Tgeinin siemi è propi in dretg siemi?

Siemi 1: Jau e dus collegas eran da return da la sortida. Jau guidava l’auto ed els sesevan davosvart. Dasper mai na seseva nagin. Jau hai dumandà els dus, sch’els sajan schon stads ina giada sin il Piz Buin. Però jau n’hai udì nagina resposta. Jau hai guardà enavos en il retrovisur – nagin na seseva pli davosvart, nagin! Jau hai vulvì l’auto, e sun turnà. A l’ur dad in guaudet hai jau vesì passivas en la naiv. Jau sun sortì da l’auto ed hai persequità ils fastizis. Apaina che jau era chaminà var 20 meters en da guaud, gieva puspè il motor e l’auto è svani. Jau sun currì enavos ed hai udì davos mai il flad dad insatgi. Disperaziun. Lura sun jau ma sveglià.

Siemi 2: In collega da mai aveva nozzas. El e sia amia han fatg ina nozza en urden, cun confamigliars, parentella, amis ed amias… insumma, ina brava festa. Jau als leva purtar in regal. In set da vaschella alva – cun plats da schuppa, plats da tschaina, plats da gentar e tutti quanti. Vers la fin da la festa vulev jau surdar quai ad els. Però merda, tut ils plats eran plain grass, rests da sosa e vanzadiras da spaisas. Ils mauns tatgavan vidlonder. Jau hai svelt prendì per mauns mes fazielet da nas ed hai entschet a schubergiar mintga singul plat. Senza success. Disperaziun. Lura sun jau ma sveglià.

Tgi sa la resposta? – En l’impressum chattais mia adressa.

Ed anc insatge: bun divertiment cun ils auters siemiaders e las autras siemiadras en questa gasetta!

texts en questa ediziun

Gian Sgier (Sil cunfin)PUNTS (Infos interns)Barbla Etter (Üna Svizra rumauntscha)Rafael Müller (Ruth ò nigns siemis ple)Flurina Badel (ABC d’interpretaziuns da sömmis)Fadrina Hofmann (Sömmis - il spejel da l’orma)Gian Sgier (Stai bein, ti ault generus)Conradin Klaiss (Egliers - patratgs davart amur e sia munconza)Clotilda (Igls siemis da Gion)Rafael Camenisch (Sas, sche ti...)PUNTS (Tge ògl nom da veiver en nivel pi bass tgi tot igls oters?)Gian Sgier (Fai fin)Pia Valär (Amur sülla prüm’öglieda)Men Caduff (Swiss - Svizra)Romina Bearth (Inizialas dessignadas)Quarta classa dil gimnasi da Mustér (ABC-Darium [fin])Anna Serarda Campell (Dischöl)Jonas Meyer (In mument senza Gates)PUNTS (Occurenzas e reclama)Conradin Klaiss (Confess)

turnar a la survista