PUNTS
la gasetta giuvna

Detagls davart l'ediziun nr. 8

schaner 1995
annada 1
Oroscops
PUNTS nr. 8
Caporedacziun: Anita Simeon
Gaudench Dazzi
Catrina Salis
editorial

1995 cun Venus, Saturn e Pluto (Guadench Dazzi)

Vers la fin da l'an nun sun be Niculaus ed aungelins da Nadel persunas zuond dumandedas, dimpersè eir tuot quels e quellas chi 's nomnan astrologs.

Bod in mincha giazetta as chatta inserats d'instituts astrologics chi offereschan, in differentas categorias da predsch, ün oroscop persunel per l'an 1995. Chi chi preferischa üna varianta pü simpla ed eir pü bunmarcheda piglia per mauns üna da las numerusas giazettinas da l'eivna.

Bod sün mincha fögl da titel as chatta in december e cumanzamaint schner in lingias grossas frasas scu: "Grand oroscop persunel da l'an 1995; amur, furtüna, sandet!" Chi nun vess buonder da savair cu cha l'an chi sto davaunt porta as svilupperegia. Cura inscuntri mia grand' amur, u sch' eau la a d'he già chatteda cura füss magari favuraivel per marider? Che fo la carriera, il conto da banca, la sandet ed oter pü.

Per ir a la sgiüra d'he güsta consulto trais u quatter da quistas giazettas chi impromettan ün sguard illas stailas. Ma invezza da chatter sclarimaint cumainzan las stailas a fer da stuorn. Ün astrolog pretenda cha marz e lügls sajan mieus mais da furtüna gün oter s'ho decis pü per meg e november. Quist dilemma as lascha schoglier auncha magari simpel. Ad es be da decider per se svess cha marz, meg, avuost e november sajan mais be furtüna e bel e fat esa.

Pü problematic dvainta que scha in ün oroscop vain annunzcho cha l'avrigl saja il mais dals mais per s'inamurer, intaunt cha ün oter cussaglia güsta in avrigl, da lascher las piclas da nouvas aventüras d'amur. lnsomma, amur es adüna iin pô üna lotteria, ma buondragius suni dad observer cu cha mieu chantunais chi d'ès pass 80 e da la listessa insaina scu eau, passainta quist ominus mais avrigl 1995.

Da l'otra vert esa darcho da ster be stut cun che precisiun cha quists astrologs u in mia cas üna astrologa, lavuran. Uschè d'he eau chatto in üna da quistas giazettas la seguainta frasa a reguard mia creativited e nouvas ideas: "Dies könnte sich zum Beispiel Ende August - Anfangs September darin auswirken, dass Sie Ihren Kleiderschrank einmotten und sich einen neuen Stil zulegen." Bingo - la fin avost fin cumanzamaint settember d'he dad ir trais eivnas a militer, e nos chapitauni ans ho già cummunicho il tema per quistas eivnas: "Umrüstung auf die neue Kampfbekleidung 90!" Ma scha que vess dad esser l'unic müdamaint creativ cha las stailas am portan quist an, schi buna not 95.

Ma forsa füssa insomma meglder da reponderer ün mumaint que chi d'es tuot giro l'an passo, invezza dad ir per las stailas. Per l'an chi ans spetta füssa sgür da pü grand avantag da pruver d'eviter l'üna u l'otra plufraria chi ans es capiteda dürant il 94, cu da bramer sün üna constellaziun da stailas favuraivla. Tenor il moto: Prouva da nu fer duos vouta il listess sbagl, la tscherna es granda.

Uossa füss dimena be auncha da sföglier in qualche oroscop, per savair che datas chi füssan favuraivlas per guarder inavous e trer bilantscha!

texts en questa ediziun

Pia Plaz (Tge painsan igls Rumantschs digl "Snowboard"?)Catrina Salis (Drovas egn flash d’adrenalin?)Adrian Pally (Invasiun schnööber kiwi)Sara Hauschild (Buenos Aires tiera de la esperanza)Gion Balzer Risch (Vacanzas senza schliata cunscienzia)Gion Balzer Risch (Profil "Eligi Derungs")Elvira Pünchera (Üna confessiun da vita – Ingrid Noll: "Die Apothekerin")Alexander Casanova (Gnanc in tretel ei gratuits)GiuRu (Quo vadis giuventetgna?)Anita Capaul (Hypermegaaffenturbotitten-obergeil!)

turnar a la survista