PUNTS
la gasetta giuvna

Detagls davart l'ediziun nr. 70

mars 2000
annada 6
Turissem
PUNTS nr. 70
Caporedacziun: Conradin Klaiss
David Truttmann
Layout: Julia Staat
Theres Jörger
editorial

Il turissem da Bob Zürcher (David Truttmann)

Stimads giasts – jau less salidar Vus en nossa regiun da vacanzas. Mes num è Bob Zürcher – jau sun il nov directur, promotur da turissem. Jau speresch che Vus hajas fatg bun viadi enfin si qua tar nus. Nus pisserain di per di per il bainstar da noss giasts. Trats tipics da la regiun, sco per exempel pizza, schnipo, spaghettis e cheeseburgers empleneschan las cartas da menu.

La damaun van alura tuts sin pista! Cun noss magisters da skis Arnold, Andri e Flurina, che san anc il dialect indigen, pudais era emprender da carver ed ir cun l’aissa. Tgi sa, forsa ch’els declaran a Vus era anc co ch’ins di "grüezi" en lur linguatg. Cun il lift rivais directamain davent da l’Hotel Capricorn enfin sin il Piz Radund. Giu da quel avais in panorama magnific sur tut quai che jau possed…ah, jau manegel sur tut nossa val da bellezza. A partir da l’onn che vegn datti era anc ina pendiculara sur tut la val ora per colliar las duas regiuns da skis da Runellas e Notta Maluns. Las mafias verdas han dentant impedì enfin uss cun millis da recurs la fabrica da quella pendiculara.

Però turnain tar noss "events". Sin il Restaurant Alpia sunan durant tut il di ils "Hänslis da Schluin". Els vegnan a trategnair Vus cun ritems tipics da nossa regiun. La saira datti alura il punct culminant. Ils scolars da nossa vischnanca preschentan il Chalandamarz. Segir che mintgin da Vus enconuscha a "Schellenursli". Gea, noss scolarets èn tuts ensemen pitschens "Uorsins", uschè charins. E tgi che n’ha suenter uschia in di anc adina betg avunda, quel è envidà cordialmain en nossa "Bar Alvetern". E là vegn alura fatg festa enfin che mintgin perda la testa – rambazamba, sche Vus enclegiais a mai!

Stimads giasts, Vus vesais, tar nus pudais giudair tut ils plaschairs da la vita. Nus da la promoziun da turissem giavischain en mintga cas bellas ed agreablas vacanzas!

Dal rest, jau hai legì ina giada en in lexicon : "Der neuzeitliche Tourismus hat seinen Ursprung im ‘Zurück-zur-Natur’-Gefühl des 18. Jahrhunderts." Damai analog a las teorias dal renumnà scriptur e filosof Jean-Jacques Rousseau. E Rousseau era già adina in grond idol per mai.

Cu in cordial "viva la Grischa" as salida Voss Bob Zürcher

Chara lectura e c har lectur da las PUNTS 70:

Las ultimas PUNTS (nr. 69) èn stadas be plain reclamas. En questa ediziun vulain nus gist anc far il punct sin il "i" e regalain a Vus in pitschen posteret da colur che la "Grischun vacanzas" ha sponsurisà!

texts en questa ediziun

Anita Simeon (Tge vendin nus propi)Jaques Guidon (ord il chardun [cartoon])Angela Schmed (Adina quels piieep turists)David Truttmann ("Illu-Sion" en Grischun? – La flomma olimpica na stida pli)Anna Serarda Campell (Rollas)Ladina Schleich (Padova)Fadrina Hofmann ("Sida – quai nu daja quia")Claudio Friberg (Nies paun da mintgadi)Anna Maria Bott (Revoluziun aint il pajais da la lungurella)Andreas Horber (Rumper il silenzi)

turnar a la survista