PUNTS
la gasetta giuvna

Detagls davart l'ediziun nr. 7

december 1994
annada 1
Nadal
PUNTS nr. 7
Caporedacziun: Anita Simeon
Gaudench Dazzi
Catrina Salis
editorial

Tge differenziescha las baselgias da sectas? (Werner Carigiet)

Il "drama da sectas" en ils chantuns Friburg e Vallais è anc adina imprimì en nus fin en il pli lontan lagugn dal magugl da l'ossa. E quai è gnanc da smarvegliar, han gea las medias pitoccas da sensaziun - RTL tochen al Blic grischun - sbluccà la charn dals cadavers da las unfrendas fin a la pli davosa fibra. E nus avain consumà e mustigià engurdamain. E tgi n' ha betg sa dumandà co in tal eveniment sa insumma chapitar. "A mi toh buc, a mi che sai sparter la paglia dil graun, a mi che sun dalla "dretga" vart." Propi? lns n'astga dentant betg survesair ina chaussa: Il "drama" en la Svizra franzosa n'ha betg mo carmalà ils aspectaturs avant ils eters da las medias, el empermetta er gronda perda en las raits dals pestgaders d'olmas legals - da las baselgias uffizialas.

Il vent fraid da quai eveniment emplaina las tailas da lur navs tschabraccas ed ins sa metta premuradamain a prender a chasa las nursas che han fatg naufragi tar cardientschas pulainas. En la scola claustrala a Mustér han ins savurà l'arrivada dal vent ed ins ha immediat envidà in anteriur adherent da las perditgas da Jehova ed actual catolic per musser cun il det: "Havais vis tge che succeda sche..."

lnsùmma: Tgi di a nus che nus sajan da la 'dretga' vart? E lura vegn anc vitiers che la "dretga" vert è er betg claramain definida. Tuppamain valan protestants e catolics sco baselgias uffizialas, duas partidas pia che han, ina dapli che l'autra da responsar millis e milliuns dapli unfrendas humanas che la secta dal tempel dal sulegl. Betg lontans èn ils temps cura ch'ina lètg mischedada tranter protestants e catolics valeva sco bigliet direct per l'uffiern e vegnivan cumbattidas fin al davos dagut da sang. - Turnan quests temps puspè? Esi betg paradox ch'ina gruppaziun sco la BOMI (Bündner Oberländer Mission) vala sco 'secta' e sco traditura da la "vera cretta" , dentant ch'il fundatur da l'Opus Dei (ina 'secta' fundamentalista da la baselgia catolica, daventada ferma entaifer il moviment faschist en Spagna) vegn beatifitgà dal Papa ed il moviment cun la giaisla vegn praticamain instituziunalisà en il Vatican ed er en la curt episcopala a Cuira? Tuts sa numnan cristians.

texts en questa ediziun

Catrina Salis (Las inslas noua c’igl e adigna Nadal)Anita Simeon (Nadal – festa dall’amour e dalla legreia – e chegl propa uscheia?)Anita Simeon („Dia è mort!" -Nietzsche)David Carigiet (Ei nossa giuventetgna pagauna?)David Spinnler (Halleluch?)Anita Capaul (Tips: per el ed ella)Claudio Barrachi (Il circus es darcho in)Isabelle Jaeger (Il rai dals set mars)Daniel Manzoni (Engiadina in Australia?!)Guadench Dazzi (La Scarziza – üna sour da PUNTS serra butia)Patricia Arpagaus-Capeder (La moda)

turnar a la survista