PUNTS
la gasetta giuvna

Detagls davart l'ediziun nr. 63

avust 1999
annada 6
Prognosas
PUNTS nr. 63
Caporedacziun: Conradin Klaiss
David Truttmann
Layout: Julia Staat
Theres Jörger
editorial

Prognosas (David Truttmann)

Quai eran anc temps cura ch’ins scheva: "Quel dal radio ha mess bell’aura." Qai èn tempi passati. Ussa din ins: "Bucheli, Kachelmann ubain Suleika han ditg ch’i fetschia bell’aura." (Interessant, tar ils umens din ins il segund num!) Gea, quai eran anc temps cura che quel dal radio sa pudeva zuppar davos ses microfon e sa vestgir sco che el vuleva. Hoz n’han ils meteorologs be da purtar bell’aura, mabain era bella vestgadira. E quella survegnan els ed ellas segir dals sponsurs Jelmoli, Spenler e Vögele. Dimena è quai tut be rauba or da catalogs tut be vestgadira simpla. Ed en quels catalogs èsi adina bell’aura. Fiss gea tup da far fotos da vestgadira en la plievgia…dentant anc interessant!

Apropos plievgia – in nivel stgir è sur nus, nair sco la notg. I daratga a tut pudair, sco cun sadellas. Quai è "la" prognosa per ils 11 avust. Noss mund va a ballins – e qai è segir e franc. Quai ha ditg noss Nostradamus avant var 500 onns. E quel ha gì differentas giadas raschun, dentant è quai ina rauba d’interpretaziun. Als 11 avust vess apunta da vegnir ina gronda smnatscha giu da tschiel. Las tesas da noss Nostradamus èn vegnidas confermadas dals astro-logs. Ed era ils astro-nauts u astro-noms han tschertas temas. In satellit cun chargia atomara da jau na sai quantas tonnas plutonium traversa las sferas da la terra. Che esser pussaivel ed alura…alura fuss tut a fin… i na vess nagin senn da far anc grondas prognosas, tut las speranzas explodissan ensemen en in bulieu atomar. Era la vestgadira…

Quel di vegni dentant segir stgir tar cler bel di, tranter las 12.30 e las 12.40 – per dus minutas e 18 secundas cuverna la glina nova il sulegl. Tar nus è la stgiradetgna da sulegl dentant be parziala. Il fenomen sa repeta en Europa centrala pir puspè dal 2081.

Sche Vus, charas Puntistas e chars Puntists, guardais quel di vers il sulegl, alura purtai buns egliers ubain guardai vers il tschiel cun in fegl charvunà – forsa cun las PUNTS.

Ans dustain cunter prognosas stgiras e faschain sez prognosas cleras per noss avegnir. Damaund, quai ha ditg Suleika, èsi bell’aura.

Bun divertiment cun las PUNTS 63 dal mais avust.

texts en questa ediziun

Anita Simeon (Entira Svizra: fermamein surtratg – in’emprova d’ina prognosa politica)Alexa Hitz (Puspei inagada zatgei dall‘aura)Il frar dal Geli (Il tatoo sil sein dretg)Anita Simeon (Maturitad bilingua – ina schanza dapli)Erwin Huonder (Belgia – dapü cu be cadavers da pulasters e Coca Cola tös-chanteda)Anita Simeon (Occupaziun per tuts)Esther Schena (Fonsi [Comic])Flurin Maissen ("Jeu less turnar a casa!")Daniel Günther (Rock ainten miraglias dad 800 onns)Ivan Zangerle e David Truttmann (Cun Diabolic on tour)

turnar a la survista