PUNTS
la gasetta giuvna

Detagls davart l'ediziun nr. 6

november 1994
annada 1
Omosexualitad
PUNTS nr. 6
Caporedacziun: Anita Simeon
Gaudench Dazzi
Catrina Salis
editorial

«Chara lingua da la mamma...» (Catrina Salis)

Propi egna beala canzùn da nus Rumantschs, nevèr? Egna canzùn ca loda igl noss vigl lungaitg mama agls ple òlts tùns (ear agl sen concret). Egna canzùn ca mussa l'amur tier egn lungaitg ca davainta adigna ple flevel. Egna canzùn patriota! Sainza problems da "Rumantsch Grischun an scola", "Rumantsch agls mieds publics'' a.a.a. ân igl Guadench Barblan (vers) ad igl Robert Cantieni (melodia) savieu scriver a cumponer lur canzùn d'amur avant circa 100 ons. Parquegl ca blears Rumàntschs careztgan cun la madema intensitad sco igls dus cumponists igl lur lungaitg, e la canzùn davantada aschi populara – betga me an Gidegna, ear an Surselva, Surmir a Sutselva. lgl himni digls Grischùns! (sper la canzun digl ischier da Trun).

Mo igls tains ân samido. Problems digl mantegnamaint da nossa "chara lingua'' àn sasvilupo da problems regiunals an problems cantunals, ea, parfign an problems digl stadi. Scuntradas davaintan dabasegns par unir danovameing las ''forzas" rumàntschas. Mo da las Scuntradas vez'ign adigna me las mademas fatschas. E l'amur tier la nossa veglia a "chara lingua" svanida? Partge vainsa alura anzuma anc canto la canzun a la fegn da la Scuntrada a Donat? Near ân me igls vigls canto ad igls giuvens ân me tarlo tier?

A sco la canzùn e vagnida cantada! La cànzun plagn legreia, amur, ea, bunameing euforia e davantada egna canzùn tresta, plàna, melancolica. Sco scha nus vessan gest sataro la nossa "chara lingua". Eassan nus propi aschi lientsch, ca nus stuagn satarar noss lungaitg, sainza spranza sen egn avagnir cler a legrevel? Jou cre betga. Nus duvragn simplameing egna nova canzùn, egn nov himni! A c'igl dat giuvens cumponists, c'ân parfign la curascha da scriver egn musical agl idiom igl ple fetg periclito, agl Sutsilvan, àn a nus musso igl Christian Klucker ad igl Rest Giusep Tuor. Near ear tut quellas bands, c'ân suno a canto agl festival da rock rumàntsch a Donat fussan igls futurs cumponists da la nova canzùn digls Rumàntschs.

Tgi sa, forza vainsa tocen tier la proxima Scuntrada egna nova canzùn, egn nov himni. Pargnea jou sund betga prunta da satarar igl Rumantsch!

texts en questa ediziun

Anita Capaul (Special avunda per esser tema per PUNTS)Guadench Dazzi ("Quei dat ei buc tier nus")Elvira Pünchera (Rapport da l’otra riva – Werner Catrina: „Die Türhüter")Claudio Barrachi (La vetta d’ozon – perspectivas)Daniel Manzoni (Ils morts dal Uluru)Catrina Salis (Paris – La ville de l’amour…)Anita Simeon (Musicals on conjunctura ota)Isabelle Jaeger (Es mincha beschin degn da gnir cloma besch?)Gion Balzer Risch (Da snowboard, halfpipes e partys)David Carigiet (Ils Gay Games: Normals giugs olimpics e tuttina zaco auter)Pia Plaz (Las codgias sursetras èn libras)

turnar a la survista