PUNTS
la gasetta giuvna

Detagls davart l'ediziun nr. 49

zercladur 1998
annada 5
Anonim
PUNTS nr. 49
Caporedacziun: Adrian Pally
David Spinnler
Layout: Julia Staat
Theres Jörger
editorial

A (Adrian Pally)

Glieud che scriva anonim, seigi glieud temeletga. Els van da quella anora che mintgin hagi da star tier quei ch’el tratga e di. Mintgin hagi era da star botta per quei ch’el lai ora. Ils "anonims" vegnan mess el medem truchet sco vandals zuppai davos mascras sin demonstraziuns che brischan autos e tartogns anonims che scrivan lur ponderaziuns sin preits da tualettas.

Jeu less denton far cheu in pign plaid en favur dil scriver anonim. Scriver anonim ha adina era da far cun in giug. Igl ei in giug denter il lectur ed il scribent, in far da pigliar ni far da sezuppar. Igl ei semegliont cun tscheiver, nua che mintgin sezuppa davos ina mascra. Dian ins buca che biars semuossien da tscheiver sco els ein per ver? Eis ei buca forsa era aschia cun quels che scrivan anonim semuossan sco els ein per ver – gie, sch’ins vul generalisar – sco "il carstgaun" ei per ver.

Quel che scriva anonim, muossa pia il ver meini, quei che tuts tratgan enzanua, quei ch’ins ughegia denton buca da dir aviartamein.

Ils "anonims" ein pia ina dallas varts dalla verdad, aschibein sco quels che scrivan cun num. Di in Giachen Maissen buca quei che tons da nus tratgan – ni il frar di Geli – ni il sprayer anonim che scriva in mir: "Stell dir vor, es ist Krieg und niemand geht hin?"

Esser anonims deliberescha il carstgaun, seigi quei dalla controlla externa ni dalla controlla interna – el marcau sesentan biars sco part d’ina massa anonima pli libers che en in vitg cun sia controlla.

Scriver anonim ei scriver libramein senza controlla dalla glieud, denton era senza la censura ch’ins metta si a sesez. Propi quei ch’ins tratga, dian ins normalmein gie buca. Ins pachetescha siu messadi en vatta per buca offender, per buca schocar, per buca tementar. Atgnamein essan nus tuts manzesers – deno ils anonims...

Enzatgi haveva fatg inagada la proposta che ils Romontschs savessen far in experiment litterar cun scriver finadin senza num, scaffir ina lietteratura diltuttafatg anonima. La liberaziun totala sco ina schanza per il Romontsch? Co fuss quei?

texts en questa ediziun

David Truttmann (TOP SECRET – La gronda sfüfla [Co blers recruts vegnan sforzads da daventar corporals])Esther Schena (Fonsi anonim... [Comic])Andreas Horber (Anonim)Daniel Günther (Igl om dalla campagna agl martgea)Conradin Klaiss (In purtret d’ ina poeta)Claudio Baracchi (Amaze us, PUNTS digital!)Isabelle Jaeger (Sri Lanka – Ele-Fantastiv)Blanka Oplatek (Posta da la China [2. part – la via])Peder Plaz (Igl salep e la furmeila)David Spinnler (Do la glüna)Seraina Caduff (Viva spert, lu eis ei "scheissegal" sche ti vas ali giavel!)

turnar a la survista