PUNTS
la gasetta giuvna

Detagls davart l'ediziun nr. 4

settember 1994
annada 1
Chatscha
PUNTS nr. 4
Caporedacziun: Anita Simeon
Gaudench Dazzi
Catrina Salis
editorial

Rassissem u la pesta (Iso Camartin)

Rassissem è ina sort da pesta mentala, chaschunada tras in virus en il center da l’identitad dal singul uman. La localisaziun dal defect è simpla: per savair esser sez insatgi, sto in rassisst disqualifitgar in auter. Per betg perder il respect da sia atgna persuna, sto el discriminar ina che sa distingua dad el tras ses corp, sia religiun u sia appartegnientscha etnica. Atgnamein è in rassisst in pauper diavel che dirigia sias agressiuns sin in auter per vegnir a frida cun las atgnas malsegirezzas e temas. Quella defurmaziun ha in aspect problematic. La pesta po daventar epidemia, ella è contagiusa, cur ch’il scherm penetrescha en il spazi public. Il rassist è in esser privlus perquai ch’el dovra il spazi public per daventar segir da sasez. Ed el entschaiva publicamein a stigar encunter quai ch’è auter che el. Pir en la gruppa da ses cumpans sa senta il rassist bain, pir cur che quels patratgan sco el, giuditgeschan sco el, ageschan sco el. Il rassist dovra unfrendas per surviver. El sto derasar odi e pretsch, sto stigar e disfamar. Perquai è in rassist in risico per il bainesser public. Ins sto limitar ses champs d’acziun, franar sia furia fanatica cunter tut quai che n’è betg da sia pasta. Ins sto metter il pauper diavel sut curatella.

Tanscha ina lescha cunter il rassissem per quel scopo? Natiralmein betg. Ins sa bain avunda ch’in defect mental sco il rassissem na vegn betg curà cun ina lescha. Ins sto prender mesiras ulteriuras anc en auters lieus. Ins sto infurmar e persvader quels ch’èn suttaposts a tendenzas rassisticas. La lescha cunter il rassissem è ina via per cumbatter ch’ils umans mettian in l’auter en clasiras positivas e negativas.

Quella lescha è dentant necessaria, ed igl è nairas uras ch’ella vegnia introducida era en Svizra. Tar nus na datti deplorablamein betg main rassists che en autras terras. Tgi ch’è encunter la penalisaziun da derasar publicamein ideas rassisticas è sez in risico per nossa societad.

Ils arguments dals adversaris da quella lescha èn fintas blauas, stgisas e stupiditad. Tgi che fugia dal fenomen quotidian dal rassissem evident e latent per defender la libertad d’expressiun cugliuna sasez. Nagin è cunter la libertad d’expressiun. Anzi. La lescha metta si buccarè mo a quels che fan cun intenziun ord auters umans esser da segunda classa.

Lain nus laschar tissientar il clima da la convivenza sco ch’i para e plascha tscherts ignorants che dovran il spretsch encunter auters per esser satisfatgs da sasez? Vulain nus laschar derasar publicamein e senza consequenzas denigraziuns d’entiras gruppas etnicas e distorsiuns da quai ch’è succedì e succeda? Lainsa pia esser sincers e betg far zuppabainbain cun ils privlus potenzial che gist nus essers umans avain en nus sezs – sco che l’istorgia demussa. Perquai: giai tuts a votar encunter il rassissem ed ils rassists. Betg sa laschai tschorventar da l’argument che en nossa Svizra na dovri betg talas leschas, damai che nus sajan atgnamain tuts da buna fai.

La lescha n’extirpescha betg il rassissem, ma ella cunfinescha quel. Quai è meglier che nagut. Bler meglier schizunt.

texts en questa ediziun

Catrina Salis (Tgatscha segls gigànts prus)Catrina Salis (Egna praia grassa)Anita Simeon (La gronda catscha è passada)Anita Simeon (La catscha è betg angal ensatge per omens)Pia Plaz (Catscheders)David Carigiet (Il luf ei da retuorn)Manfred Gross (Instinct u perversiun)Claudio Barrachi (La buocha d’luf es...)Flurin Spescha (4. dis da litteratura a Domat 1994)Cristian Buser (Lobby)Werner Carigiet (Giuventetgna e clima)Werner Carigiet (La BZ impedescha la formaziun d’opiniuns objectiva)Anita Capaul (Profil cun Flurin Spescha)Guadench Dazzi (Jodel cun techno beat)Elvira Pünchera (A savura da chatscha)Alexander Casanova (Ussa ei tut vargau)Gion Balzer Risch (L’invasiun brina)Patricia Arpagaus-Capeder (Giuventegna pupergnada?)Sara Hauschild (Culla "happy pil" in ün bel muond nov)

Datotecas
  • 4.pdf (128.00 KiB)
turnar a la survista