PUNTS
la gasetta giuvna

Detagls davart l'ediziun nr. 38

fanadur 1997
annada 4
Mafias
PUNTS nr. 38
Caporedacziun: Adrian Pally
David Spinnler
Layout: Julia Staat
Eddy Huonder
editorial

Ogi encunter la mafia (David Spinnler)

Ils gronds calibers da la mafia taliana, Brusca e Riina, èn en praschun. En memoria da lur victima da la giustia, Falcone, datti manifestaziuns e festas. Il chauffeur da Falcone – el ha survivì l’attentat – di ch’i fiss meglier ch’el fiss era mort. El vegn sustegnì mo mal dal stadi talian e patescha da differents traumas. Da talas victimas na discurra nagin.

Da l’ina vart ils success da la giustia encunter la criminalitad organisada e la populaziun che ha il nas plain. Da l’autra vart però il sistem che gira enavant précis tuttina: victimas emblidadas, corrupziun, volenza e.u.i. I dat novs Bruscas e novs Falcones. L’Italia è in exempel, la Russia fiss in segund. La criminalitad organisada funcziuna internaziunalmain meglier che la UE ed autras organisaziuns legalas. I vegn fatg commerzi cun armas, drogas, dunnas...

Era en Svizra datti Bruscas e Riinas (betg talmain violents forsa): I dat in martgà da drogas e nus lavain raps per tuts senza far stupidas damondas. A Zug è vegnì arrestà in fiduziari che vegn atgisà dad avair lavà raps per la mafia russa. Il possessor dal local "Planet Hollywood" da Turitg vegn mess en colliaziun cun la mafia russa en ils meds da massa svizzers. E danunder vegnan tscherts turists russ a San Murezzan ad avair lur plics da bancnotas?

Ina figura sco Falcone n’exista betg anca en Svizra, ma noss politichers sa stentan cun leschas che duessan impeder il lavar raps. E perfin cusseglier federal Ogi ponderescha sch’ins na stuess betg laschar cumbattar l’armada encounter la criminalitad organisada.

Bainbaud vegn dimena ad esser tut la populaziun masculina da la Svizra per almain trais emnas l’onn occupada cun la tschertga da mafiosis: fisiliers barattan il schluppet cun egliers da sulegl per persequitar mafiosis potenzials en ils locals da San Murezzan. Davant las portas da las grondas bancas a Turitg vegnan ad esser postads trieps da grenadiers cun vestgids discrets per arrestar ils delinquents che sortan da la banca cun raps gist lavads. E las scenas da drogas vegnan ad esser survegliadas permanentamain da schuldads che pon immediat arrestar ils gronds peschs cur ache quels fan lur affars.

texts en questa ediziun

Daniel Monn (Broda brina)Peder Plaz (Mafielgias)David Truttmann (A James Bond nu fuss quai stat listess)Tanja Cazin (Con funcziuna la mafia – mafia, stadia e camorra)Giachen Maissen (Mafia el Grischun – in pareri)Prisca Roth ("La mafia es scu il Bap etern" – "Il Cigno" da Sebastiano)Guadench Dazzi (Vassalli)Il frar dil Geli (Els ein aschia)PUNTS (Rocket Chairing)Daniel Günther (Ride the wild wind)Claudio Barrachi (Il "fatal error" grischun)PUNTS (Ils cantauturs passiunai)

turnar a la survista