PUNTS
la gasetta giuvna

Detagls davart l'ediziun nr. 37

zercladur 1997
annada 4
Disoccupaziun
PUNTS nr. 37
Caporedacziun: Adrian Pally
Anita Simeon
Gaudench Dazzi
Layout: Julia Staat
Eddy Huonder
editorial

Perfecziuno, dischoccupo, frustro (Guadench Dazzi)

Zieva avair fat ün giarsunedi scu laborant da chemia a Domat es R. sto trais mais in America per perfecziuner sieu inglais. Turno ein Svizra è’l ieu giò Turich per fer la scoulaziun scu commerciant tecnic. Daspö ses mais tschercha R. (23) üna plazza da lavur illa sparta vendita, marketing e management da products i’l sectur da la chemia.

Fin hoz ho’l scrit 25 annunzchas ed es registro tar duos büros chi intermedieschan plazzas, sainza success. Per üna plazza in sia sparta as annunzchan in media var 70 persunas. Püssas voutas e’l sto illa stretta tscherna ed adüna ho’l stuviu udir, cha sias qualificaziuns sajan fich bunas, ma ch’el saja memma giuven e cha mauncha l’experienza.

R. nun es registro sco dischoccupo. Sur inviern ho’l do uras da passlung in Engiadina e fat differentas lavurinas e lavurettas, ma dad eivna in eivna crescha il frust.

Il cas da R. es tipic per bgers giuvenils. Eir ün giarsunedi cun üna scolaziun suplementara e bunas referenzas na garanteschan hoz pü automaticamaing ün’occupaziun sül mister. Tschercho es bain glieud giuvna, flexibla e dinamica cun üna buna furmaziun, cuors suplementers, cugnuschentschas da linguas estras ed oter pü, però scha pussibel persunas cun püss ans experienza. Adüna pü pochs patruns da lavur sun pronts d’introdüer nouvs collavuraturs e d’investir temp e raps illa scoulaziun dad impiegos giuvens.

Quist fat as refletta eir illa spüeta da las plazzas da giarsunedi. Tenor l’Uffizi federal d’industria, mastregn e lavur (UFIML / BIGA) ris-cha quist’an mincha deschevel scolar, chi sorta da la scoula secundara u scoula reela, da rester sainza plazza da giarsunedi. La situaziun in Grischun nu pera auncha dad esser uschè alarmanta, ma in tuot la Svizra mancharegian quist an var 5’000 plazzas da giarsunedi. Il Cussagl naziunel ho perque in avrigl da quista an do liber ün credit da 60 milliuns francs per ingrandir la spüerta da las plazzas da giarsunedi.

Cha patruns da lavur reageschan sün impuls finanziels ho muss ün proget dal chantun Grischun. Daspö il 1993 organisescha il chantun cun success praticums per giuvenils chi haun glivro ün giarsunedi e chi nu chattan plazza. Il böt da quist proget es da spordscher a giuvens dischoccupos la pussibilited da’s sculer inavaunt e da ramasser experienzas praticas. Il patrun chi piglia ün praticant u üna praticanta per ses mais survain uschedittas contribuziuns d’introducziun. Il prüm mais important quellas 60% da la peja zieva tschinch mais auncha 20%. Dapü cu trais quarts dals giuvenils chattan zieva il practicum üna plazza u vegnan infinieus al lö da lur practicum. Tenor Christian Flütsch dal post regiunel per intermediaziun da lavur a Samedan, nu saja que grazcha a quist system uschè greiv da chatter lös per absolver ün practicum. Divers patruns sajan pronts, zieva ch’els haun introdüt ün giuvenil, da til infinir fix in lur affer.

Da’s demander es unicamaing scha que es la lezcha dal stedi da surpiglier ils risc-chs e’ls cuosts d’introducziun per ün nouv collavuratur u üna nouva collavuratura. Dumando fuss eir dapü curaschi e sen per respunsabilited dals patruns da lavur. Impustüt da quels chi pretendan gugent dapü liberated e main intervenziun dal stedi.

texts en questa ediziun

Peder Plaz (Deep Blue e la disoccupaziun da dumang)Giachen Maissen (Disoccupaziun – in pareri)Anita Simeon (Senza lavur)David Carigiet (Fascinaziun Sahara)Daniel Günther (Send us rodas alla mar)Adrian Pally (Profil dal mais cun Deep Blue)David Spinnler (Liber e sulvadi senza violenza)Anita Simeon (Pic-nic digls friseurs)Isabelle Jaeger (Viadi inavo I’il temp – ils amish a Pennsylvania)Elvira Pünchera (Mobbing u chi es l’öv marsch)PUNTS (Babetta ei el claus)

turnar a la survista