PUNTS
la gasetta giuvna

Detagls davart l'ediziun nr. 35

avrigl 1997
annada 4
Bellezia
PUNTS nr. 35
Caporedacziun: Adrian Pally
Anita Simeon
Gaudench Dazzi
Layout: Julia Staat
Eddy Huonder
Gioni Fry
editorial

Tgi che ama la tridezza, vesa la bellezza (Anita Simeon)

Sch’ins legia in magazin da moda pari ch’ins haja in roman da science-fiction en maun. Sin mintga segunda pagina vesins creatiras surnaturalas: Amazonas che han ina grondezza da circa in meter ed otganta ed ina largezza da deschdotg centimeters. Curiusamein han ellas in grond sain che para d’esser exclus d alas leschas da gravitaziun. La bellezza ideala sa lascha tegnair a pitg cun dunnas sco Claudia Schiffer u Cathérina Deneuve. Ma ils ideals n’èn betg dapertut ils medems. I para d’esser ina lescha nuperscritga che la furma ideala d’ina dunna sa lascha mesirar vi da la bainstanza da la societad. Ha in pievel dad endirar fom, alura duess la dunna esser corpulenta, regia però surabundanza alura sto la dunna esser magra setga.

Datti insumma ina definiziun generala da bellezza? Jau crai che Leon Battista Alberti, in grond architect e filosof dal 17avel tschentaner haja chattà ina buna resposta: "La bellezza è ina tscherta harmonia da las singulas parts, uschia ch’ins na po agiuntar u prender davent nagut senza ch’ins fa donn a l’entir." Bellezza è damai perfecziunament en tut ils detagls. En la realitad da mintgadi cul quai dir che la dunna po vegnir dividida en varsaquantas parts ch’ins po alura prest taxat tenro normas: La pel senza brumbels, fina, arsa dal sulegl (ma betg memia fitg), e prest dapertut senza chavels. Las unglas glimadas minuziusamain. Ils chavels glischants. Ils egls gronds. Las chommas lungas ed il pass gracil. Negin centimeter quadrat stat da la vart, mintga toc sto permanent vegnir inspizà, reparà e surmalegià, sco tar ina carrosseria d’autos. Vitiers vegnan anc las prescripziuns che sa laschan mesirar en gramms e chilos: la paisa da norma e la paisa ideala. I n’è betg da surstar che las buttiglias, scatlas e bischlas cuvran plaun plaunet il spievle ashcia ch’ins na vesa betg pli sia atgna fatscha.

E nua stattan ils umens en chaussa bellezza? Existan per els naginas normas idealas? Naturalmain datti era visions d’in um ideal. In maletg da l’um ideal exista già dapi il taimp da la renaschientscha: il David da Michelangelo. Oz daventa cosmetica era en il mintgadi d’in um adina pli impurtant. I na tanscha bainbaud betg pli da mo far la barba. Ma la pressiun sociala n’è betg uschè ferma. Il maletg da la bellezza d’in um ha plitost da far insatge cun sportivitad, vitalitad e dinamica. Ma pertge resentins in um corpulent pacific e genuin, ina dunna sur la paisa normala però da character debel? Il criteri numer in tar in um è e stat anc adina l’intelletg percunter scriva ina gasetta per dunnas claramain: "In IQ scu quel dad Einstein porta deplorablamain nagut sch’ins vesa or sco sia sora schumellina."

È la bellezza damai mo ina chaussa da las dunnas? Na, quai na crai jau betg. Il desideri d’esser perfetg commova mintga carstgaun, la dumonda è mo sch’ins contempla sulettamain la bellezza exteriura. La harmonia perfetga san ins mo cuntanscher sche era la bellezza endadens constat.

texts en questa ediziun

PUNTS (Bellezza sto pitir)Prisca Roth (Profil dal mais cun Pippo Pollina)Daniel Günther (Musica er sainza benzin)

turnar a la survista