PUNTS
la gasetta giuvna

Detagls davart l'ediziun nr. 28

settember 1996
annada 3
Sex avant la lètg?
PUNTS nr. 28
Caporedacziun: Anita Simeon
Gaudench Dazzi
Layout: Gioni Fry
editorial

Erotic errors u tia vöglia dvainta (Guadench Dazzi)

Scha sülla prüma pagina da la Talina (anteriura giazetta da giuventüna da la Surselva) staiva il pled "sex", e scha quista fatschenda gniva a l’intern er auncha tematiseda cun pled e purtret, schi provochaiva quist fat aunz pochs ans auncha ün pitschen s-chandel local. Hoz nu’s s-choda pü üngün scha PUNTS tematisescha ils chüls e muossa qualche bella vart.

Erotica e sexualitad sun omnipreschaints in nossa cita da minchadi. Giazettas ed illustredas nu laschan passer in’eivna s’occuper da temas charnels. Vers mezzanot muossa ün u l’oter chanel da televisions filmins e filmets, inua cha reschisuors as sfaidan da chatter üna colliaziun plausibla traunter üna scena da let e l’otra. Invezza da musser parfüms, cigarettas, pasta da daints u vstieus preschainta la reclama pü gugent ün bel "body”. Butias cun accessoirs erotics nu’s rechattan pü in üna giassa s’chüra, dipersè illa zona pedonela da las citeds u scu a Cuira dasper qualche instituziun chi s’occupa da la bibgia.

La revoluziun sexuela dals ultims 30 ans ho gieu bgers effects positives. La sexualited nun es pü quel dimuni prievlus d’üna vouta chi ho pissero per tauntas neurosas. Be pü pochs crajan hoz cha fer l’amur saja cun pochas exepziuns collio cun ün pcho. Tres l’omnipreschentscha dal sex illa vita da minchadi e la commerzialisaziun da l’erotica dvainta la sexualitd però üna chosa banala. La fascinaziun da la sexualited ris-cha dad ir a ballins scha l’intimited, la sensualited e la tensiun vaun a perder. Sex nu pera pü d’esser qualchosa speciel ed incalculabel.

Cun mieus pissers as haun eir occupos rotschas psicologs e sociologs. E quels dischan cha quista innundaziun cun attracziuns eroticas saja la cuolpa cha nus perdans vi e pü la vöglia da fer l’amur. La scena da techno vela per els scu indicator per las nouvas tendenzas illa vita secuela da la giuventüna. Eir scha’ls vstieus, u que chi’d es resto dad els, laschan supponer cha que as tratta cò d’üna roba vaira charnela, es la scena da techno in quist reguard ter prusa. Provocher, flirter ed as preschanter schi, tucher e pas-cher scumando, ho nom la devisa. In quel cas saregia eir l’assoziaziun "vair’amur so spetter”, inua cha giuvenils as oblieschan da nun avair contacts sexuels fin ch’el u ella as marida (vair artichenl), ün oter indiz per üna giuventüna vi e pü asexuala.

Però, cullas analisas da psicologs e sociologs es que üna roba: Bod muossan retschercas cha la giuventüna nun hegia oters interess cu drogas e sex (discussiuns a reguard il film "Kids”) e bod prognostiseschan el cha’ns passaregia la vöglia da far l’amur. Eau per mia part…

texts en questa ediziun

Anita Capaul (Parter il letg avon la lètg?)Gion Balzer Risch (Logo?!)Gion Balzer Risch (Neiv, crema da sulegl e t-shirts)Anita Simeon (Sex avant la lètg)Guadench Dazzi ("Tü dvaintast sclev dals deisideris”)Pia Plaz (Camp da battasendas an Ungareia)PUNTS (Profil dal mais cun Lina Frei-Baselgia)Sara Hauschild (Swiss made)David Spinnler (Urs Widmer e’l "sifon blau”)Claudio Barrachi - (Sgrafits engiadinais)

turnar a la survista