Detagls davart l'ediziun nr. 22

Rumantsch ed daplü co "buna not e dorma bain" (Guadench Dazzi)

Cur ch’s tratta da la lingua rumantscha as mettan persunas d’utrò sco eir blers Rumantschs a far predgias da funeral. Eir in vista a la votumaziun da l’artichel da lingua, chi varà lö als 10 da marz, vain bler plont e bavü plüssas palormas. La gazetta Facts (11/1) disch da l’artichel 116: "Er schafft die Bedingungen für ein aktives Ableben. Dies Altersturnübungen sollte man der romanischen Sprache gönnen."

Eir scha l’artichel para a prüma vista pac spectacular, schi s-chaffischa el finalmaing l’egualità dals drets tanter las quatter lingua svizras. I nu’s tratta d’ün artichel ne per finanziar ün funereal rumantsch ne per garantir o stabilir ün museum rumantsch suot tschêl avert, dimpersai el dess unicamaing spordscher üna basa per cha possans mantegner, sviluppar e viver nossa lingua i’l minchadi. Eir in vista al privel cha in 100, 200 o 300 ons stenda l’ultim Rumantsch propi la chomma, nun ha ingün il dret da cundannar già hoz a giuvens e giuvnas Rumantschas ad ün "schöner Sterben" (Facts). Tenor studis dals linguists dal tschientiner passà vessan nus dad esser già bel e morts, invezza che faina, nus eschan amo quia ed ans dispittain amo adüna sur dal möd sco ch’d es da’ns salvar.

L’artichel po metter a disposiziun ils mezs ed il rom giuridic, per tuot il rest vaina da pisserar nus Rumantschs e Rumantschas. Nus pudain decider sco chi dess ir inavant cul rumantsch e che posiziun che’l dess avair in nos minchadi.

Dumandada es però eir la regenza dal chantun Grischun chi as zoppa gugent davo consultaziuns, retscherchas e gruppas da lavur invezza d’avair il curaschi da preschentar soluziuns e models pussibels quai chi pertocca il future e la posiziun dal rumantsch in scoula, administraziun o i’ls mezs da massa.

Sco s-chüsa pretendan politikers suvent cha’s possa far alch, be scha tuot ils Rumantschs e las Rumantschas sajan d’accord. Davo üna votumaziun ingo cha 60% dala populaziun ha vuschà da schi nu vain neir ingün politiker süll’idea da dir cha nu’s possa far nöglia, già cha 40% d’eiran cunter. La mancanza d’unità totala nu dess esser il motiv per metter ils mans in gialoffa! Perchè be mez morts nu’s dispittan.

Bernard Cathomas (Tge porta il nov art 116?) — Anita Simeon (I dat bler da far!!) — Anita Simeon (Zapping è an/ena moda) — Dennis Adams (Artitgel 116 ord vista Americana) — Pia Plaz (Pertge?) — Martin Bundi (Romontsch – lungatg culs medems dretgs) — David e Werner Carigiet ("La giuventetgna rumantscha è il portasperanza dal linguatg rumantsch"– intervista cun Ruth Dreifuss) — PUNTS (Profil cun Georges Darms) — Gion Balzer Risch (Snowboard-Contest e Sens Unik) — Sara Hauschild (La renaschentscha dal telemarc) — Elvira Pünchera (Deschdoch pops cun ün sach farina – Anne Fine: Il proget dals poppins) — Werner Carigiet (Tge ch’ils Rumantschs vulevan adina savair dal rumantsch)