PUNTS
la gasetta giuvna

Detagls davart l'ediziun nr. 178

zercladur 2009
annada 16
Crisa
PUNTS nr. 178
Redacziun: Flurina Cajochen
Victoria Mosca
Catrina Waldegg
Layout: Annatina Nay
Marina Lutz (illustraziuns)
editorial

En la crisa (Annatina Nay)

Jau sun sin via encunter chasa. Mes tren spetga sin il binari sis. Sin il binari visavi spetga il tren da notg per Vienna. Quai fissi! Scappar dal mintgadi – gist uss – gist questa saira per finalmain ina giada pudair baiver in café cun latg la damaun a bun’ura – natiralmain a Vienna.

Far in viadi viadora en il blau – scappar da las crisettas e crisunas dal mintgadi. Schebain jau ma chat mumentanamain en ina crisa, na sai jau betg respunder, ni cun gea ni cun na. Cura èn ins en la crisa e cura dastg’ins menziunar quai publicamain? Quantas giadas avain nus gia ditg «jau hai voll la crisa», «jau survegn la crisa» u «jau sun en la crisa»?

Jau survegn la crisa, cura ch’jau pens vi da la proxima visita tar il dentist, cura ch’jau ves il stan actual da mes conto u ils termins nudads en mi’agenda. Jau survegn la crisa, cura che mes computer na fa betg quai ch’jau vi u sch’il latg manca la damaun marvegl en frestgera. Jau survegn la crisa, cura ch’jau legel da la crisa – ch’i saja quella finanziala, globala u quella sociala. La finala dependa tut da la crisa e consequentamain dals daners. Sche ti n’has nagina lavur, n’has ti era nagins daners. Ti survegns la crisa pervi da la crisa. Datti eventuals remedis cunter la crisa? Proclamadas vegnan valurs da basa sco la famiglia ed ils amis. Viadis en muntogna substitueschan las vacanzas en la Caribica e tschanar a chasa è bain pli pratic che mangiar en il restaurant.

Ed uss? È l’uman cuntent cun sia vita plaina da crisas? Piglia el avunda seriusas las crisas proclamadas? Tge fa PUNTS en temps da crisa? PUNTS fa frunt a tut quai cun in’ediziun da crisa. La miseria lascha avrir novas portas. PUNTS noda e pugna vinavant – per in café a Vienna na vegni betg a tanscher – tuttina avain nus investì tut nossas energias e resursas en quest’ediziun. Nus preschentain crisas da puntists(as) per puntists(as) e quai en da tuttas variantas.

L’entir team da PUNTS giavischa a tai, chara lectura e char lectur, bun divertiment cun l’ediziun nr. 178 in pau pli speziala e bun success da surmuntar culms e crisas.

texts en questa ediziun

Catrina Waldegg (Amprender? Amprender!)Valeria Martina Badilatti (Crisa productiva)Astrid Alexandre (Mia relaziun cun quella ch'jeu numnass il pli bugen buc)Chatrina Josty (La reclamaziun)Oliver Nyffeler (Il cumbat cunter la crisa)Victoria Mosca (Il vermin)Victoria Mosca (L'Engiadina in meg)Silvana Derungs (Dapli che mo furmias?)Salome Guetg (Crisa da la plazza)Saskia Del Zotto (Lauda il di buc avon la sera)Fadrina Hofmann Estrada (Mamma mia - crisa d'educaziun)Olivia Mosca (Crisa i'l studio da radio)Catrina Waldegg (La crisa annuala)Ciril Berther (Punts e piogns)Martin Cantieni (senza titel)Liricas Analas (Hey!)

Datotecas
  • 178.pdf (2.15 MiB)
turnar a la survista