PUNTS
la gasetta giuvna

Detagls davart l'ediziun nr. 177

matg 2009
annada 15
Subcultura
PUNTS nr. 177
Redacziun: Flurina Cajochen
Victoria Mosca
Catrina Waldegg
Layout: Carlo Clopath
editorial

Per asexuals fin ultra-zelots (Silvana Derungs)

Ès ti in punk, ina hiphopra, in ultra-ortodox, ina dretg-radicala, in hippi, in skatergirl, in dals rockabillies, ina gothica u in vegetari u forsa ina puntista fanaticra? Charas lecturas e chars lecturs, quest’ediziun sa deditgescha a las subculturas da nossa societad e forsa che vus remartgais cun la lectura ch’i n’è gnanca uschè simpel da definir quest term. È quai ina dumonda da la quantitad u da la differenziaziun da la norma vertenta? (Tge è lura insumma la norma?) Furman tut ils commembers da facebook ina sort subcultura? U è quai ina societad sco autras era che cuntegna en ella differentas subculturas? Èn ils Turitgais en ina classa rumantscha gia ina subcultura? E furma in’autra orientaziun sexuala che la norma eterosexuala er ina subcultura? Èn ils teenies sco gruppa dad ina tscherta vegliadetgna er ina subcultura?

In teenie par excellence èn numnadamain era questas PUNTS che ti tegnas gist enta maun. Las PUNTS èn cun quest’ediziun dal matg 2009 numnadamain daventadas 15 onns veglias. Avant passa 15 onns han insaquants students rumantschs (probablamain er ina spezia da subcultura) decidì da fusiunar las revistas studenticas rumantschas da quel temp ad in’unica gasetta rumantscha surregiunala. Nus da la redacziun dad oz sperain che nus possian leger anc en 15 onns in editorial da gratulaziun per il 30avel anniversari da la gasetta giuvna che ha lura speranza surmuntà sias lunas pubertaras...

Part da quellas lunas fan tranter auter pannas da furniziun, sco quai ch’igl è per exempel il cas tar l’ediziun speziala CUSCHINAR. Quella festivescha quest mais ses emprim anniversari da retard. Nus ans perstgisain tar noss abunents (e tar las bibliotecaras ed ils bibliotecaris che cumplettassan gugent la seria dal 2008) e sperain da pudair trametter proximamain l’ediziun da CUSCHINAR.

Ed uss, charas lecturas e chars lecturs – che vus appartegnias lura als eterovegetals, transradicals, ultrasexuals, ovo-lacto-conservativs, neofanatichers, bioliberals, low-fat- fundamentalists, omoconservativs u metroortodoxs – jau as giavisch bun divertiment cun quest’ediziun subculturala.

texts en questa ediziun

Flurina Cajochen (Distanza da segirtad denter veta reala e virtuala)Saskia Del Zotto (El mund dil hip hop)Lea Livers (Co sesentan umens homosexuals en nossa societad?)Orietta Peduzzi (Subcultura ≠ Subcultura)Catrina Waldegg (Agl our dalla societad)Victoria Mosca (Tscherts Rumauntschs a Cuira)L'emprima secundara da Zuoz (La scola)H. (Musica)Fadrina Hofmann Estrada (Mamma mia)Ursin Lutz (Il pled dal mais)Simon Casutt e Roman Liesch (punts politicas)

Datotecas
  • 177.pdf (1.20 MiB)
turnar a la survista