PUNTS
la gasetta giuvna

Detagls davart l'ediziun nr. 171

november 2008
annada 15
Gieus
PUNTS nr. 171
Redacziun: Flurina Cajochen
Sandra Monn
Victoria Mosca
Catrina Waldegg
Layout: Annatina Nay
editorial

Vulain dar in gieu? (Silvana Derungs)

Gieus sveglian la fantasia (cf. pagina 3); gieus eviteschan la stupiditad televisorica ed animeschan a discurs (cf. pagina 4); gieus promovan – tut tenor gener – il pensar logic, cumplessiv, strategic e creativ; gieus pon dentant era far vegnir malsaun, allontanar nus da la realitad – e quai betg mo per la durada da 30–240 minutas.

Gieus datti per mintga gust e mintga situaziun: gieus da tavla, gieus da chartas, gieus da rolla (betg mo quels erotics); gieus da computer; gieus per ir en viadi, per ils quals ins dovra nagut u forsa be palpiri e rispli; gieus che duran 15 minutas u pliras uras; gieus ch’ins po dar sulet u en dus, en trais u en 18 u en 22; gieus cun in factur da cletg da 100% fin giu sin 0%; gieus sco tals, per giugar, ma era gieus sportivs, gieus da pleds, tocs da teater, gieus auditivs, gieus festivs ed uschia vinavant.

Enavos tar mes gieus preferids: ils gieus da cumpagnia. Pertge hai jau l’impressiun ch’i vegnia dà paucs gieus – malgrà tut la varietad ed ils effects positivs da quels gieus? (Schegea... suenter avair legì ils texts da questas PUNTS stoss jau forsa reveder mia impressiun.) U in’autra dumonda: Pertge restan ils blers tar ils gieus ch’els enconuschan gia e n’emprovan betg novs gieus? Dependi da la bursa? (Gieus da tabla han mintgatant in bun pretsch, quai constat.) Èsi forsa ina tscherta marschadetgna mentala dad activar il pensar? (Jau na vi betg discreditar insatgi, quai è era mintgatant tar mai in obstachel.) U ta starmentas da leger e chapir las reglas da gieu? (Co fissi cun in cudeschin da reglas dad 80 paginas che instruescha, co far la battaglia cun tschientineras da figurinas cunter tes adversari?) U il fatg ch’i dat insumma reglas? Èsi la tema da perder il gieu? La tema che vegnian a la glisch la flaivlezza da memorisar, l’incumpetenza da pensar logic-strategic u l’incapacitad dad esser creativ? (Quai passa. E sch’il gieu finescha en ina catastrofa, lura èsi tuttina stà u disfortuna u in idiot d’in partenari u simplamain in tup gieu.) U èsi simplamain perquai ch’in u plirs partenaris da gieu mancan? (Legia questas PUNTS e forsa chattas ti insatgi per dar in gieu, contactar pos ti las persunas via www.punts.ch.)

Ed ussa: buna lectura e buns gieus cun PUNTS nr. 171 en quellas lungas sairas d’enviern.

texts en questa ediziun

Catrina Waldegg (Gis gidan alla creativitad)Tanja e Flurina Augustin (Gis da tgertas)Gianna Sonder (Iniziativa per daple gis da cumpagneia u la nossa WG cun e sainza)Curdina Maissen (Gulasch en schelentera - il niev crimi romontsch)Silvana Derungs (Linguissimo - linguas, scriver musica: Ina concurrenza da scriver per giuvens e giuvnas)Silvana Derungs (Le Disque - Nua che Sascha Hehn ed Arturo Casanova s'entaupan)Sara Hermann (GiuRu: La seria)Clau Dermont e Roman Liesch (Las PUNTS politicas: Noss cussegl federal)Anna Serarda Campell (Eu, eu ed eu - fictiv e flexibel: Gö nudritiv)Fadrina Hofmann Estrada (Mamma mia - Cuba libre)Flurina Cajochen (Per cuort temps el mund da film)Ursin Lutz (Il pled dal mais)Chatrina Josty (La WG: Gieu d'abitar)team PUNTS (Il meglier da RTR)Jon Bischoff (Fumetto)team da PUNTS (Malcuntentienscha? Na! Motivaziun, engaschi e plaschair!)

Datotecas
  • 171.pdf (962.17 KiB)
turnar a la survista