PUNTS
la gasetta giuvna

Detagls davart l'ediziun nr. 161

december 2007
annada 14
Surprise
PUNTS nr. 161
Redacziun: Chatrina Josty
Flurina Badel
Martin Cantieni
Silvana Derungs
Flurina Cajochen
Layout: Carlo Clopath
editorial

Ina surpraisa è ina surpraisa è ina surpraisa (Ursin Lutz)

Dis senza surpraisas na datti betg, quai avev’jau silmeins cartì . n oz. Oz, igl è schont las 22:14, è aber stà in tal di. Il temp ha però anc bastà per ina surpraisa. Avant ch’ir a letg hai jau tschertgà – be per spira mirveglia – in text sin l’internet. E quai text è stà mia surpraisa dal di, legì ina giada, duas giadas e trais giadas per realisar, chapir e per decider sche quai saja uss ina surpraisa positiva u negativa.

Durant la lectura èsi ì baud fraid, baud chaud dal dies giu, e senza guardar en il spievel hai jau sentì ch’jau sun vegnì cotschen. Quai è pia stà mia surpraisa, be mia surpraisa. Surpraisas èn numnadamain dal tuttafatg subjectivas – per tut tschels che legian u han schont legì «mes» text è’l forsa gnanca ina tala surpraisa sco per mai. Jau hai gì mia surpraisa per oz, mia sentenza è sa cumprovada ina giada dapli, uschenavant è damai tut en ses urden. Jau hai dentant era semtgà ina u l’autra surpraisa per vus, chars lecturs e charas lecturas. L’emprima da quellas tegnais vus gist en maun – questa ediziun da PUNTS è numnadamain sezza ina SURPRAISA. La proxima surpraisa spetga en l’intern da questa ediziun. Per quella giada avain nus avert nossa gasetta era per giuvens grischuns da lingua tudestga e taliana. Nus avain pia la superbia d’as preschentar ina sort miniatura da la trilinguitad grischuna.

E per la terza surpraisa turn jau puspè anavos tar mai: L’onn è per ir a fin e cun el era mia lavur tar e per PUNTS – cun quella chaschun di jau pia «bye bye punts e bye bye lecturs e lecturas e chau ed adia». Suenter uss tuttina inqual onn puntistic hai jau decidì ch’i bastia. Sin quella via sper jau da ma pudair deliberar dad ina u l’autra surpraisa en l’avegnir – la lavur tar PUNTS ha dentant procurà principalmain per surpraisas positivas. Quai che resta – speranza anc ditg – è la surpraisa che sa tschenta mais per mais en la chascha da brevs.

Jau sper che quest’ediziun enserria era per vus, chars lecturs e charas lecturas, ina u l’autra surpraisa – bun divertiment.

texts en questa ediziun

Chatrina Josty (La schleppa)Sandra Monn (La surpresa ei el plastic)Andri Perl (du hier)Yannic Gross (Grazcha a l'uors daja movimaint in Val Müstair)Gianna Cadonau (Indifferenza)Florian Eitel (Giorno di novembre)Fadrina Hofmann Estrada («Spamantsch»)Cornelia Candreia («Surpresa è en schaiss!»)Silvana Derungs (Ina glisch sonora surprendenta)Victoria Mosca (Gian)Catrina Waldegg ("Die Überraschung ist einfach ein «wertvolles» Gut!" ed "Betg fasche scu schi fiss ena surpresada")Michela Nussio (Sorpresa)

Datotecas
  • 161.pdf (4.53 MiB)
turnar a la survista