PUNTS
la gasetta giuvna

Detagls davart l'ediziun nr. 153

mars 2007
annada 13
Geniturs
PUNTS nr. 153
Redacziun: Chatrina Josty
Flurina Badel
Martin Cantieni
Silvana Derungs
Layout: Donat Caduff
editorial

Genialitad vegn da geniturs, u betg? (Silvana Derungs))

Dacurt hai jau legì en in artitgel ch’i dettia per geniturs futurs perfin la pussaivladad dad emprender d’enconuscher lur uffant anc betg naschì – live or dal venter da mamma, per uschè da dir. Cun agid da la tecnica dad ultrasun-3D (e da passa 200 francs) san quels geniturs satisfar lur marviglias che stuessan atgnamain resister nov mais. Ed jau hai pensà: Tge tgutgs! In pop en il venter ed ina tecnica medicinala en stgaffa per scopos da divertiment. U èsi per avair la controlla? Anc pir. «Jau sun anc betg naschì u naschida, ma mes geniturs èn gia controlfreaks!»

Dacurt hai jau vis in film, ed jau hai survegnì ina crisa mo gia pervi da las dispitas permanentas en quest film, ed jau hai pensà: Jau na less betg avair uffants – surtut betg ina figlia da tredesch onns!

Na, esser genitur n’è betg in sugus. Als aspectaturs che han – sch’i va bain – anc latiers nagina idea dad esser genitur, dattan ins adina in motiv da critica e buns cussegls: U ch’ins puprogna sia descendenza, u ch’ins na s’occupa betg avunda dad ella u ch’ins na dumogna betg il caracter in pau difficil da l’uffant. Quai èn er experientschas che Fadrina Hofmann ha stuì far. Ella sa trair parallelas tranter l’esser possessura/mamma dad in chagniel e l’educar uffants. E che l’educaziun è principalmain chaussa dals geniturs, cun quai giain nus bain tuts d’accord, ma las magistras.ch han era gia stuì far autras experientschas e portan in appel a geniturs futurs.

Er esser uffant n’è però betg in sugus. Ins sto sa stentar cun problems che noss geniturs na chapeschan betg, u ch’els na vulan betg chapir, u ch’els na san betg pli sa regurdar da lur uffanza. Ed ins metta magari er en dumonda las acziuns ed ils vizis da noss geniturs che vegnan mintgatant era numnads noss exempel. Quai han era las scolaras ed ils scolars da la terza classa da Müstair fatg e tradeschan vizis e virtids da lur geniturs. (Detagl interessant: La moda da fimar dals geniturs dat u ha dà da patratgar a tscherts uffants …) Nus na giain pia betg adina d’accord cun las acziuns da noss schendraders, il potenzial da conflicts è preprogrammà. Quantas giadas ans essan nus sentids malchapids da noss geniturs? Quantas giadas avain nus gì ina gritta narra sin noss geniturs pervia da lur principis d’educaziun? Quantas giadas essan nus stads engraziaivels a noss geniturs per lur principis d’educaziun, ma n’avain betg vulì conceder quai? Quantas giadas ans essan nus turpegiads pervia dal depurtament da noss geniturs visavi nossAs collegas? («Geniturs èn insatge herzig – sch’igl è quels dals auters!» ha ina amia remartgà dacurt, cura che nossa gruppa fascheva adia a la mamma dad in ami.) E quantas giadas avain nus engirà a nus sezs: «Jau na davent segir betg sco mes geniturs!»

E lura daventain nus pli vegls e vesain tschertas sumeglientschas fisicas cun bab e/u mamma. Janu, quai na san ins betg midar. Ma nus na daventain anc adina betg sco els. E lura daventain nus anc pli vegls (e sabis) e stuain mintgatant far la terribla constataziun: «Uss sun jau precis sco mia mamma / sco mes bab!» Tragic. Ma probablamain be per nus e noss ego e noss engirament d’uffanza. E lura daventain nus anc ina giada pli vegls e respundain, sche nus vegnin dumandads suenter noss idols: «Mes geniturs».

Jau giavisch a vus tuts e tuttas, ad uffants e geniturs, ina buna lectura da las PUNTS 153 e bunas discussiuns – senza dispitas sa chapescha.

texts en questa ediziun

Flurina Prenner (Chars chars genituors)Chatrina Josty (10 dumondas a mes geniturs)Silvana Derungs (Eva – la mumma dallas mummas – e sias feglias)Pia Valär (Ti vuls savair: Las dunnas nudistas)Chatrina Josty (Mes Tracks: Roman Flepp)Tinetta Rauch (La soap: Ün muond curius III . Part)B (Magistras.ch: Genituors)Fadrina Hofmann (Che vita da chans: Meis uffant il chagnöl)Anna Serarda Campell (One year in Paris: Daplü musica... Oui)Jon Bischoff (Fumetto)Roman Liesch , Jon Pult (Las Punts politicas: Geniturs)Silvana Derungs (Musica, moviment e divertiment)Donat Caduff (Amsterdam: Doei-Doei)

Datotecas
  • 153.pdf (4.30 MiB)
turnar a la survista