PUNTS
la gasetta giuvna

Detagls davart l'ediziun nr. 152

favrer 2007
annada 13
Skis
PUNTS nr. 152
Redacziun: Chatrina Josty
Flurina Badel
Martin Cantieni
Silvana Derungs
Layout: Annatina Dermont
editorial

Viva la Skrischa! (Chatrina Josty)

Finì cun las larmas da tristezza dals sportists d’enviern svizzers: I va ensi! Noss cumpatriots cun aissas vi dals pes gudognan puspè: Ils ins sgolan uschè lunsch sco mai, ils auters èn sperts sco mai. E saja quai en la halfpipe, sin pista u sin la loipa, era giuvens grischuns dattan gas. Uschia per exempel il giuven passlungist sursilvan Toni Livers; tranter trenament e cursa ha el gì in mument per dar in’intervista al schefredactur da las PUNTS, Ursin Lutz.
Tut quels che fan sport d’enviern han insatge cuminaivel: Els fan sport sin aua schelada, pia sin glatsch e naiv. E da glatsch e naiv essan nus tuts dependents insaco. Che nus sajan sportists passiunads u simplamain perquai che la naiv è en il Grischun l’aur alv, il sang en nossas avainas, il sang da nossas muntognas.

Ma nus patin, l’aur è stgars e periclità, il midament dal clima stat avant porta. Silvana Derungs ha ils scenaris. E tge faschain nus lura propi, sch’i n’ha in bel di betg naiv pli, betg glatsch en il Grischun? Tge capita cun noss’economia, tge economia duessan nus lura avair? Questa dumonda avain nus fatg a nos politichers Jon Pult e Roman Liesch. Jon Pult propona in midament dal sistem ecologic, quai che pretendia in midament politic. El di: adieu chapitalissem! E Roman Liesch manegia – sche nus na tschiffain betg la curva – da simplamain ir “back to the roots” e viver a moda primitiva, quasi nus en il freiluftmuseum, ed ils turists che pon vegnir a guardar co nus faschain quai. Ed insaco gia fatg quai, vivì cun in minimum da luxus ed in maximum da natira ed aria frestga, ha il superskiunz american Bode Miller. El è creschì si en ina chamona lunsch davent da la civilisaziun. Ma el na fiss betg quai ch’el è oz senza l’essenzial – senza la naiv.
Ma gist pretender da tuts ch’els fetschian carriera sin naiv, gliez è bunamain pretais memia bler; suenter nauschas experientschas en sia uffanza ha Gion Hosang bittà en in chantun ses skis. Quai era avant 10 onns – ils skis èn anc adina là.

Nus savain dentant – far sport d’enviern na sto esser collià adina cun strapatschs corporals. L’après-ski è ina varianta che va quasi adina. Questa funcziuna senza naiv, ma strusch senza glatsch – per tegnair fraid il schampagner. Flurina Badel ha fatg il test. En quest senn “viva” e bun divertiment cun quai e cun bler auter en vossa gasetta giuvna preferida!

 

Illustrada è quest’ediziun da PUNTS tranter auter cun fotografias da skiunzs a la veglia e cun fotografias dals geniturs dals redacturs da PUNTS. Quai gia sco preavis per il proxim PUNTISSIMO: Geniturs.

texts en questa ediziun

Chatrina Josty (In simbol da sex sin skis)Flurina Badel (Après-ski cun Michi, Anton ed Angelina)Silvana Derungs (Unviern senza neiv e plintas)Gion Hosang (Ir cun skis entuorn casa)Ursin Lutz (Intervesta cun Toni Livers)Roman Liesch ed Jon Pult (Las Punts politicas: Asilants en lieus turistics)B (Magistras.ch - Scolast(a)s sin pista)Flurina Badel (Ti vuls savair: Minutas orgasmicas)Donat Caduff (Amsterdam: Ils viadis)Tinetta Rauch (La soap: Inscunter)Fadrina Hofmann (Che vita da chans: Meis cordonbleu)Anna Serarda Campell (One year in Paris: Ün tschendrin s.v.p.)Chatrina Josty (Mes Tracks: Mario Pacchioli)David Bundi (Il gieu dal mais: Concurrenza)

Datotecas
  • 152.pdf (4.35 MiB)
turnar a la survista