PUNTS
la gasetta giuvna

Detagls davart l'ediziun nr. 15

avust 1995
annada 2
GIG (gruppa d'interess da giuventetgna)
PUNTS nr. 15
Caporedacziun: Anita Simeon
Gaudench Dazzi
Catrina Salis
Layout: Gioni Fry
editorial

Mouva’t per ova, tschêl e terra (Gaudench Dazzi)

Temp da vacanzas: Dal lej a Segl a la chavorgia dal Rain populeschan quist dis darcho turists ova, tschêl e terra. Vi e pü pochs as cuntaintan cun girer in stinvs cotschens per la cuntredgia u cun ster pachific sün ün giaschaditsch a sulagl. Vacanzas e temp liber dumandan hozindi activited! Scha già ir in munatgna, schi lura es da rampcher sainza sua e cul outfit vulieu sü per qualche grip. Oters prefereschan dad ir cun ün velo sü e giò per las costas, as torturand fin che la laungia panda giò tals pedals. Sün vias catramedas cun poch trafic passan ils scaters, sün lur skis u pattins cun rodas, be spüfs tres la val. Quels e quellas chi nu roudlan e nu chaminan as tschaintan sün ün chavagl e’l chatschan sur munt e val, per pudair fer ün uschedit tracking.

Ma eir l’elemaint ova vain hozindi trat a nüz pü effectivamaing cu avaunt ans. Fer bagns da peis in qualche ley da muntagna es out. Lejs pü grands cun bun vent crivlan da surfers, uschè cha da spür velas nu’s vezza magari niauncha pü l’ova. Noss flüms sporschan ün eldorado per tuot ils canuists e rafters, e be üna u l’otra turbina fo passer il gust da naviger inavaunt vers il mer.

Eir ils utschels haun clappo concurrenza. In tscherts lös ho que dapü parasvuleders, aviuns a vela e deltas cu randulinas. Quels e quellas chi prefereschan ün svoul precipito as büttan giò d’üna punt per as fermer be pochs centimeters aunz il bletsch, grazcha l’elastic intuorn ils peis. Chi chi nu ho auncha avuonda da tuot quistas activiteds dal di ho la pussibilited da’s lantscher la saira sül parquet da qualche disco e da sagliutter fin vers bunura.

Che diavel mauncha a quists povers disperos che haun üna tela arsaja da’s mouver? A stu esser cha’l chatsch natürel da’s metter corprelmaing in muvimaint vain vi e pü a la cuorta. Avuonda pevel ed üna u l’otra glischada nu basta pera, ne pels umauns ne per las bes-chas, per ster bain. Que dvainta evidaint il pü tard cur ch’ün observa il tigher u l’uors da glatsch aint il zoo chi fo scu in trance adüna listess gir in sieu revier restret, u la gillinas illas battarias chi da spur esser cundannedas d aster salda as stiran our tuot las pennas.

Las lavuors chi dumandan muvimaint corporel vegnan vi e pü reras. Cun ster tuotta di davaunt ün computer as mouva il pü da tuot la daunta ed ils ögls e cò e lo il tscharvè, ed il telefoner promouva unicamaing la musculature da la gianoscha. Cun tschanter düraunt la lavur in qualche trabicul nu vain la musculature neir gust surdumandeda. Rivo la saira a chesa consist ail muvimaint pelpü in avrir la s-chantschia fraida, trer aint las pantoflas ed as placher davaunt la televisiun, e lo as mouvan unicamaing ils purtrets.

Dimena es da’s metter in muvimaint düraunt las vacanzas. Il moto ho perque nom, uschè suvenz scu pussibel piglier e partir, e cul agüd da l’auto nun es que üngün problem. Apunta mobilited moderna, ma cun ster aint il auto scu ün sach ardöffels as riva bainschi dad A a B, ma ils purtrets filan be speravi scu cun guarder televisiun. E pü d’ün as sainta scu ün tren u l’aviun, ma eir quels sun vi e pü surchargios, uschè cha’s ho l’impreschiun dad esser üna gillina in battaria. Per nu stuvair as strer our tuot las pennas esa dimena da tschercher alternativas.

Hoz nu basta que pü da paquetter las chotschas da bagn, crema da sulagl e partir, dimpersè ad es d’equiper l’auto cun assa da surf, mountainbike, canu ed ün remuorch cul aviun a vela. E tuot que be per as pudair mouver?

Basta, eau nu d’he quell problem, perche ova, tschêl e terra chi spordschan tuot las qualiteds vulidas sun be davaunt chesa. Ma uossa stögli fer ed ir, il mountainbike spetta giò’n garascha.

texts en questa ediziun

(Il "papi" dalla GIG – si cun el!)David Carigiet ("La scaffiziun d’in local da giuventetgna fuss ina buna chaussa!")Anita Capaul ("Tgei tgagia en Surselva")Peter Herter (La Svizra)Toni Poltera (Schi Dash davainta Hash)Toni Poltera (Extrem?!)Claudio Barrachi (Techno ans invoula il weekend)Anita Biert (Ün man crotsch, il Svizzer e lefs cotschens)Catrina Salis (Profil cun Justina Derungs)Anita Simeon (Beton e tetgs plats)Werner Carigiet (Parlament da giuventetgna)Werner Carigiet (Val Lumnezia 95)Gion Balzer Risch (La mort ei sco ina lotteria)Elvira Pünchera (Roger Graf – "Philip Maloney: Tödliche Gewissheit")

turnar a la survista