PUNTS
la gasetta giuvna

Detagls davart l'ediziun nr. 148

settember 2006
annada 13
Trettel
PUNTS nr. 148
Caporedacziun: Annatina Nay
Flurina Badel
Gianna Sonder
Mevina Feuerstein
Silvana Derungs
Layout: Martin Cantieni
editorial

Trettel (Martin Cantieni)

Jau hai empruvà da betg glischnar sin champ politic, da betg exprimer ina opiniun politica, uschè sco in bun editorialist dad ina gasetta politicamain neutrala sco las PUNTS fa quai. Jau hai tschertgà sgnoccas da trettels en l’internet, jau hai empruvà da far tschertas perscrutaziuns etimologicas davart tof, pup, trettel e.a.v., jau hai perfin prendì nanavant il diari da las aventuras da l’America dal sid ed hai scrit giu ina passascha che tracta da trettels. Jau hai cumenzà trais, quatter propostas… Tut be merda. Jau ma sun decidì da scriver - sch’i sto gia esser trettels - davart in vair trettel, in trettel politic: la nova lescha d’asil.

Dapi onns ha l’uffizi da migraziun mai stuì tractar main dumondas d’asil che l’onn 2005. Daco uss rinforzar la lescha?

Dapi ils onns otganta è la lescha d’asil be vegnida pli restrictiva. Dovri anc ina frida dapli? E per mai vai gnanc per ils detagls (era la lescha actuala n’è betg buna), per mai vai per insatge fitg fundamental: la rolla da la Svizra, sco in dals pajais pli ritgs dal mund. N’è quai betg in zichel arrogant da la Svizra da sbragir sur la mar mediterrana vi (ina bartga da fugitivs va gist sut), sur il Niger ora (salips han gist destruì tut la racolta), fin en Sudan (in buob da 15 onns vegn sfurzà da rebels da mazzar ses geniturs) : "Nus avain er nagin plaz!"

E la stgisa ch’ins na sappia betg tge tgi capita diesch milli kilometers davent na vala betg pli l’onn 2006.

Ma uschè stretg na vesan ils cristiandemocrats betg quai (da las partidas burgaisas gnanc da discurrer). Ina giada dapli han els ignorà ils principis cristians ils pli fundamentals e decidì da sustegnair la revisiun da la lescha. Sche ti na vas mai en baselgia e vul tuttina esser in bun cristian: ils 24 da settember has la chaschun da far bun in u l’auter putgà cun dir duas giadas NA a quest trettel che pudess tissientar nossa "tradiziun umanitara" per in detg mument.

Dad auters trettels e na-trettels tracta questa ediziun da las PUNTS.

texts en questa ediziun

Gianna Sonder (Switzerland versus Europe [u Paris toffa])Ursin Lutz (Guid da cultura egl internet - www.surselva.ch)Fadrina Hofmann (Single tschercha… [part I])Mevina Feuerstein (Che fer in cas da scufladüras?)Fabian Augustin (Dastga preschentar: Igl trettel)Maurus Blumenthal (Profil dal mais: Pierin Vincenz)Ursin Lutz (Nova cumpilaziun romontscha sin DC)Silvana Janett, Academia Engiadina (Ils tofs)Chatrina Josty (La WG: La WG perfetga)

Datotecas
  • 148.pdf (1.98 MiB)
turnar a la survista