PUNTS
la gasetta giuvna

Detagls davart l'ediziun nr. 147

avust 2006
annada 13
VIP
PUNTS nr. 147
Caporedacziun: Annatina Nay
Flurina Badel
Gianna Sonder
Mevina Feuerstein
Silvana Derungs
Layout: Roman Schmid
editorial

VIP (Silvana Derungs)

VIP, ni per rumantsch PIV (peptid intestinal vasoactiv) è la denominaziun dad in hormonpeptid (cumbinaziun chemica ord ina connexiun da plirs acids aminus) che consista da 28 acids aminus. Il PIV vegn producì en il duodenum (il begl curt), sche grass cumparan là. El funcziuna sco transmettur neuronal (substanza biochemica che surdat las informaziuns dad ina cella da gnerva a l'autra) e modulatur neuronal (substanza che influenzescha la moda da lavurar dal sistem neuronal) en la gnerva dal sistem gnervus central. PIV regulescha la producziun da schlem en las vias respiratorias e retarda supplementarmain l'encuagliada dal sang. ... etcetc.

Mo saja che quai PIV vegnia producì en il begl da dudesch dets ni en il hipotalamus ni sut nossa bratscha – emporta pac. Quai che ans interessescha vi da la scursaniziun VIP n'è betg il PIV (eba quest peptid stinà activ); betg l'adressa virtuala-IP, betg V.I.P., ina gruppa da musica polaca; betg las paneelas d'isolaziun a vacum PIV ed era betg la tualetta VIP (ventilation improved pit – toilet) cun la construcziun dad in bischen da ventilaziun supplementar che vegn promovida da las Naziuns Unidas per terras en l'Africa. Quai che nus umans normals chapin sut l'abreviaziun VIP è ina PFI, ina persuna fitg impurtanta. E normalmain associain nus quels trais bustabs cun il maletg dad in superstar, ina chantadura ni forsa x-in "mischter". Mo quai "impurtant" è relativamain relativ e na sto gnanc avair ina gronda impurtanza e sa er significar tant sco "renumà", e quai lu era mo sin basa regiunala u locala e temporala.

VIP è in titel transitori. I vala pia da nizzegiar quest temp. Per insaquants n'èsi dentant gnanc necessari da procurar per "publicity", l'interess per lur persuna vegn tut da sasez, sco per exempel tar retgs e princessas u uffants da PFIs. Haiaiai. Cun tgi che quist tabalori è ì en letg – e lura anc sa laschar traplar ... O Dieus! Tge trid vestgì che quella porta, cun ses raps pudess ella era sa lubir in vestgì cun dapli taila... Ha! Perfin quella ha cellulita vi da las chommas... Och, quel ha mo aria en sia testa. Tge fortuna per el d’avair in bun manager... Quel n'ha era betg sut controlla ses figl-bavader...

Daco è la vita da quellas persunas uschenumnadas fitg impurtantas uschè interessanta? Daco ans interessain nus per "clatsch e tratsch"? L'interess è relativ, ma observar la veta da questa glieud è mintgatant in confiert. Era quellas persunas n'èn betg perfetgas. Ufff ... E per gidar a lur "coming-out" quels e quellas che legian en il zuppà las davosas novitads da starlets e prominenzas qua ina tesa scientifica: il fatg che nus savain sa regurdar meglier da novitads da tschantscharias deriva da l'evoluziun. Quai nus gida d’ans orientar meglier en la societad; savair tgi cun tgi (era sch'i sun persunas luuuuunsch ordaifer noss circul d’enconuschents) è damai in agid sociologic.

Che vus sajas lura sociologs u vipologs ni pfilogs u uschiglio pilots, en il nr. 147 da las PUNTS chattais vus franc insatge per voss gust. Bun divertiment.

texts en questa ediziun

VIP ()Flurina Badel (Illustra tamberlanaria - l’esser vair dal dalet o paperlapà!)Ursin Lutz (Sun jeu in VIP?)Daniela Derungs , Silvana Derungs (PFIs agl OAVL)Carin Caduff (Rapport digl Open Air Trun 2006)Mevina Feuerstein (VIP in etern)Giuru e Quarta Lingua (Il Quadern - zweisprachige Texte aus der jungen Rumantschia)Ursin Lutz (Profil dal mais: Marc Cathomen)Arno Camenisch (Tuppa schnorra: RIP)David Bundi (Il gieu dal mais: Fifa 2006)Silvana Derungs (Regiun Surselva: Transfer Tecnologic Surselva)Marc Bundi (SMDF: Vacanzas)Rico Valär (Vi ai pi?)Carin Caduff (Las notgs selvadias)Chatrina Josty (La WG: Chez Frau Zimmerli)

Datotecas
  • 147.pdf (1.34 MiB)
turnar a la survista