PUNTS
la gasetta giuvna

Detagls davart l'ediziun nr. 146

fanadur 2006
annada 13
Trocca 7
PUNTS nr. 146
Caporedacziun: Annatina Nay
Flurina Badel
Gianna Sonder
Mevina Feuerstein
Silvana Derungs
Layout: Donat Caduff
Madlaina Janett
editorial

Trocca 7 (dal team da PUNTS)

Suentermezdi enturn las duas e mesa era il gentar sin maisa – otg puntistas e puntists sesevan enturn maisa en stiva da la Casa Depuoz a Siat. Martin ans porta adina puspè surpraisas. Quai ha el n’er betg laschà mancar quella giada. El ha numnadamain purtà la Tinetta, uschia ch’i n’è betg stà ina sonda saira exclusivamain sursilvana. Tinetta ha pia represchentà l’Engiadina a Siat.

Però tge scriver? Tuts avevan pli grond interess da discurrer e star en cumpagnia che da chattar in puntissimo per quest’ediziun. Il num da quai vitg ch’ans ha dà albiert per la fin d’emna da PUNTS fa allusiun a las cifras. Mo tge pigliar a man cun cifras? In crimi, gea exact quai pudessan nus scriver. Però co pudain nus tuts scriver vi dal medem crimi?

Suenter tschaina ans essan nus decidì da scriver pliras istorgias curtas, u sulet u en dus. In pitschen maletg duai colliar las singulas istorgias. Cunquai che nus essan stads en la Casa Depuoz avain nus prendì la decisiun che quella sequenza communabla stoppia avair lieu là.

Insaquants èn lura ids a la tschertga d’informaziuns sur da la chasa e dals anteriurs possessurs da quella, auters èn ids en l’ustaria Surselva per il prim sitg. Ma propi gust da scriver aveva nagin quella saira. Tuts speravan che la musa vegnia forsa la notg en furma da siemi. Cura ch’ins ha finalmain puspè ina giada la chaschun da seser ensemen fissi bain donn da betg nizzegiar quai per interessants discurs. La dumengia marvegl – brentina ed ina fina plievgia avevan enzuglià Siat – han las tastaturas dals laptops finalmain cumenzà a tunar. Cunter saira èn ils blers schont ids vers chasa, tscherts èn er vegnids vers chasa. Quai dependa adina sch’in Sursilvan u in Engiadinais vegn u va. La Gianna – nossa ferma pitga en Surmecr ed il pulschain da nossa redacziun – è persuenter anc vegnida.

Prezià lectur, preziada lectura, en mintga text chattas ti suandanta sequenza: Sin ina curuna da cudeschs chatta ina persuna in cudesch, numnadamain Die Dreizehnlinden da S. W. Weber. Sin pagina 43 da quel cudisch sa chatta ina trocca. Quai è la trocca 7, il char. Sin il revers da la charta è scret en russ "Tgi che tschertga, chatta".

Per tut ils na-Sursilvans: Troccas – en tudestg Tarock – è in gieu da cuminanza, purtà en Surselva dals Franzos. Ils Austriacs n'enonuschevan betg quai gieu, uschia n’enconuschan er ils Engiadinais betg quel. Il gieu consista da 78 chartas. 22 da quellas èn las troccas, chartas pli fermas che las autras. Mintga trocca ha ina cifra ed in maletg en furma d’in simbol che stat en stretga relaziun cun las cifras. I n’è betg segir, la renaschentscha da la cabala en la Spagna a la fin dal temp medieval po però havair gì in'influenza sin la creaziun da quellas chartas.

Bun divertiment cun il misteri da la trocca Siat.

texts en questa ediziun

Ursin Lutz (Tric e trac)Annatina Nay (Lein dar poker?)Sereina Nay , Maurus Blumenthal (La trocca da Suworow)Gianna Sonder (Semi)Tinetta Rauch (Quiettezza)Silvana Derungs (Neu e vi)

Datotecas
  • 146.pdf (871.61 KiB)
turnar a la survista