PUNTS
la gasetta giuvna

Detagls davart l'ediziun nr. 14

fanadur 1995
annada 2
Ambient
PUNTS nr. 14
Caporedacziun: Anita Simeon
Gaudench Dazzi
Catrina Salis
editorial

Cumportainsa nign silenzi ple? (Catrina Salis)

Egn gi, ussa schon avànt eandas, igl eara betga la ple beala ora, ve jou gieu avunda da tut las ramurs a caneras c’en anturn me mintga gi. Jou vevel avunda digl rumplanem da maschinas da bietg, da canerùnas dad autos a camiùns, a parfign avunda digl batarlem a clamar anturn da la glieud. Jou level finalmeing puspe egn eada quieteztga, nut ca disturba adigna anturn me.

Nus eassen schon aschi disos veda tut quellas ramurs, ca nus santagn gnànc ple, quant dadàlt c’igl e anturn nus. Scha nus vagn igl santimaint – forza da notg – bagn ussa e’gl tut quiet, ea ear alura od’ign ànc u la ramur dad egn stgàldamaint, da la stgafafreda, near da la veia naziunala ca magna sper vischnànca vei.

Cugl santimaint da betga ple saver cumportar quella canera, ve jou sadezidieu dad ir egn toc par la muntogna sei, sei ancunter las aclas sur igl guld. Jou speravel da ver là ampo quieteztga. Tocen tier igl cunfegn digl guld sund jou betga rivada, mo bunameing. Tier igl "Lai ner" ve jou tanieu eri, sund sasida sen egn crap sper la riva, ve vurdo sen l’aua ca gnànc samuntava. La surfatscha eara sco egn spievel. Me anqualgeadas fageva egn dagut da plievgia ir undas radundas sur igl antier lai.

Ad igl eara quiet, betg quiet. Nigna canera da maschinas, nign rir a bargliafar da carstgàns, ea gnànc la N13 udev’ign sà qua. Anqualgeadas egn maset ca cantava near egna giagia da guld ca craschlava tras la val. Sur igl lai an la grepa earan egn peer corvs near tgapers ca dispitevan par anzatge. Ea, ussa savess ign gea gir, c’igl eara tutegna betga digl tut quiet. Bagn, par me schon. Igls cloms digls utscheals fagevan or aschi egna beala harmonie cun quel silenzi se qua. Igl disturbeva betg, ea, igl fageva gest or, c’igl plascheva a mei aschi bagn. Partge ca cun tut quellas ramurs ca nus essan disos, ear’igl bunameing ampo malprivo sainza nigna canera a nut.

Cur ca sund sasida sen quel crap a ve tarlo intensivameing igl silenzi, e’gl a mei cun egn’eada vagnieu andamaint, c’igl savess gea parfign dar glieud, ca cumporta gnànc tala quieteztga. Tgi c’e naschieu a carschieu sei an egn martgieu grand, noua c’igl e gi a notg canera da trafic a da bietg, tgi sa, quels ancanuschan gnànc la quieteztga sco nus ancanuschagn ella da las muntognas. Jou savess simaginar, c’els savessan forza gnànc durmir bagn sainza la canera dad autos tuta notg. Bien, jou stoss gir, jou earal ear leada da saver turner puspe agl ambiaint diso, noua c’ign sa bagliafar cun la glieud a noua c’ign sto betga gest ver tema da l’aitgna vusch, parquegl ca’la para aschia dadàlta. Mo jou sund fetg leada, ca jou ancanusch ànc egn peer liacs, noua ca jou se ir, cur ca ve avunda da las caneras, da la zivilsaziun.

texts en questa ediziun

Toni Poltera (Viagier ed ambiaint)Anita Capaul (Jeu mesirel caneras)Adrian Pally (Ina historia da buna notg)Anita Simeon (I dovra l’iniziativa da mintgign)Anita Simeon (Igl sulegl sur igl "Matterhorn")Werner Carigiet [A la scuverta da la terza (e quarta…) dimension] - Sara Hauschild)Elvira Pünchera (Rocky in memoriam – La vita cuorta d’ün junkie e d’ün diler)Guadench Dazzi (5. dis da litteratura – Ti e Corin Curschellas exclusiv a Domat)Guadench Dazzi (La relaziun traunter ajer fin e la sveltezza dal pical) (PUNTS Profil cun Gioni Fry)Pia Plaz (50 onns ONU)Romana Flütsch (Ils cas dals Vogels)

turnar a la survista