PUNTS
la gasetta giuvna

Detagls davart l'ediziun nr. 13

zercladur 1995
annada 2
Clischés
PUNTS nr. 13
Caporedacziun: Anita Simeon
Gaudench Dazzi
Catrina Salis
editorial

Happy Birthday (Anita Simeon)

"Ussa è ella pia qua" – uscheia era igl tetel segl frontispezzi da PUNTS nr.0. Ed ella è anc adegna a cò! Siva d’en onn, oramai dodesch nombras PUNTS, egl oss oura da trer eneda bilantscha.

Digl bébé ainten la tgigna u anc avant ainten il tgea d’encaltgi fantast è ossa carschia en dretg unfant tgi ò giò amprandia ad eir sen aginas tgommas. L’è schon anc en zichel falomber ma an general reiva el da metter bagn en pe davant l’oter. Ma igl carstgang nò mai amprandia tot, el amprenda ena veta duranta e chegl renda la veta pir interessanta. Er nous na vagn betg ansenn da star agl status quo. Nous vagn adegna puspe ampruo da far encaltgi midada, encaltgi experimaint, per uscheia er contanscher daples spartas da lectours. Tschertas da chellas midadas ans èn gartagedas, otras manc. Ena midada positiva è franc stada la midada digl layout – ed ia sa az garanteir tg’igl niro proximaintg a dar ena surpresa an chel gros. Era las nossas retgertgas davart igls omens e las donnas rumantschas òn catto grond resung. Franc ògl er gia en tema u l’oter tgi ò comuento lecuours tar reacziuns – e chegl è egn digls noss intents primars. Cant interessanta tgi la gasetta PUNTS è per te, lascha giuditgier te tez – tgi so, forsa ast eneda taimp da screiver a nous ena carta cugl ties meini?!

Nous vagn però er ancurschia tgi ena gasetta meinsila è cumbinada cun gronda lavour ed investiziun da taimp – surtot er per la comunicaziun tranter igls redactours e tranter las diversas redacziuns. Or da chel muteiv è igl noss post da secretariat fitg impurtant tgi è nia mano da Hedy cun grond angaschamaint.

En problem essential da PUNTS èn surtot er las finanzas. Nous ans vagn betg gist tgartgea or igl migler taimp economic per antgever cun en nov project. Igls affars na von betg schi bagn, dapertot vign razionaliso ed igls tips dallas reclamas n’èn betg uscheia "da ghebis" scu er schon. Ma problems èn co per schliier ed igl schlantsch ed igl tgaffen vetiers ans mantga crei betg.

"PUNTS – ia gratulesch a te per ties amprem anniversari e sper tg’ia possa gratular anc varsacantas gedas!"

texts en questa ediziun

Sara Hauschild (Clisches)Sara Hauschild (L’infiern sco lö da lavur)Catrina Salis (Il tipic Svizzer)Catrina Salis (Cur ca minoritads discrimineschan minoritads)Guadench Dazzi (Il Sursilvan)Guadench Dazzi (Rumauntschs e Rumauntschas)Claudio Barrachi (Uffiziel)Toni Poltera (Machos ni: gl’èn dapertot) (PUNTS Profil cun Iso Albin)Adrian Pally (GIG – dapli che mo ina nova abreviaziun)Elvira Pünchera (Ingo Hasselbach: "Il rendaquint")Daniel Manzoni ("Ad es critic – e nus tuots sperains")David Carigiet (Cu in sport para da snegar sesez per saver daventar in object dil consum da massa)Anita Simeon (Rumantsch – lungatg privat)

turnar a la survista