PUNTS
la gasetta giuvna

Detagls davart l'ediziun nr. 129

favrer 2005
annada 10
La mort
PUNTS nr. 129
Caporedacziun: Annatina Nay
Gianna Sonder
Mevina Feuerstein
Silvana Derungs
Layout: Martin Cantieni
editorial

La mort (Maurus Blumenthal)

"Emprenda ad acceptar la mort, beneventa ella. Sajas curtaschaivel cun la mort e la mort daventa tia amia. Cur che ti has emprendì da retschaiver la mort svanescha tut la tema e sgarschur, e ti entschaivas a viver en vaira pasch."

I dat sulettamain in veritabel problem existenzial sin quest mund – e quai è la mort. Mo la mort è surtut in tabu en nossa societad. E quai en emprima lingia perquai che tut nossas valurs pendan vi da quest mund. La mort suffla ora tal cura ch’ella vul sco ina pitschna chandaila. Era il patratg da la mort maina a la mort dal patratg. Nus ans fatschentain tut il temp cun fugias en cuntentientschas da curta existenza – cuntentientschas orgasmicas en furma dad autos, sex, daners, cuschina... I dat era blers cudeschs che explitgeschan co ch’ins po dar a noss ego anc ina pli gronda cuntentientscha.

Mintga cultura posseda ina differenta confruntaziun cun la mort. En l’Africa moras ti surtut perquai che insatgi vul quai da tai, en l’India perquai ch’i stat scrit en las stailas, en l’Islam perquai che Allah cloma tai. Tar nus moras ti perquai che il cor na batta betg pli ed il tscharvè grond na dat nagins signals pli. Mo cura es ti propi morts e pertge moras ti? Qua datti milliuns respostas.

I dat dentant era differentas morts. La naschientscha è gia l’emprima mort. Mintga naschientscha è liada cun ina mort. La metamorfosa cuntegna ina mort. Quai vesan ins fitg bain en la natira, p. ex. tar las resulaunas e las tgirallas.

La tema regia il mund e surtut la tema da la mort. Tut la violenza ha sia funtauna en quella tema. Perquai è il sa fatschentar cun la mort na betg mo insatge per tes agen bun mabain era per il bun da noss entir mund.

Entras la mort sa mussa era la valita dad ina persuna. Persunas da gronda valita re-tschaivan gronds funerals, quels da pitschna valita na vegnan gnanc encurschì. Las medias accumpognan quest contrast – mintga di moran circa 10000 persunas directamain u indirectamain da la fom sco era circa tschintg schuldads americans en l’Irac. Tge infurma-ziun legias ti en las gasettas?

Jau sper che l’ediziun 129 dettia a ti, char lectur e chara lectura da PUNTS, in impuls per la mort. En quest senn, bun divertiment cun la mort.

texts en questa ediziun

Claudio Derungs (La mort - ina caussa finala)Silvana Derungs (Mort - e lu? - Flurina Henkel)Annatina Nay (Il donatur d'organs - in'emprova poetica)Martin Cantieni ("Los muertos", Argentinia 2004 - in film da Lisandro Alonso)Chatrina Josty (Tranter umens: Bainvegnì Ralf!)Ursin Lutz (Assistenza alla mort)Maurus Blumenthal (Ina cuorta historia dalla mort e da quei che po vegnir suenter)Laura Meng ("Zieva la mort nun es ünguotta, simplamaing ünguotta")Roman Derungs (Fiug e flomma - schibettas)Flurina Prenner (L'hom da la fatsch)Flurina Prenner (Mia lunga via)Flurina Prenner (Cumgià)Marc Bundi (Intervesta cun Mathias Aeschlimann) (Brev da lecturs)Marc Bundi (Seria meinsila da fotografias: WG da students)Patrick Capaul (Las schibettas dal mais)Roman Schmid (Bush porta la mort)Arno Camenisch (Tuppa schnorra: Gustmort)

turnar a la survista