PUNTS
la gasetta giuvna

Detagls davart l'ediziun nr. 127

december 2004
annada 10
Silvester
PUNTS nr. 127
Caporedacziun: Gianna Sonder
Mevina Feuerstein
Ursin Lutz
Layout: Donat Caduff
editorial

Necrolog (Rafael Müller)

Igl fritgevel enedeschavel onn dallas PUNTS ò purto gronds deletgs: nov layout, novs collavuratours, ena festa cun fi e fem e betg d’amblidar la mia mort. Perchegl fon chestas lengias, atgnamaintg deditgeidas agl editorial, plaz a chest necrolog da giubileum.

Cun vantg onns sung ia, Rafael Müller, naschia a Mon e da cardentscha catolica, nia an contact cun las PUNTS. Alloura anc sen la tschertga da senns ed oters gaiveischs postpubertars, ma santiva bagn ainten la cumpagneia da chesta gasetta mademamaintg mintgatant sen la tschertga da senn. Sen cultura dava chels onns bler ed ansemen cun ena tscherta Fadrina H. da S. vaia fatg carriera puntistica. Scu oters rumantschungs da Mon (schi ena tscherta Vinzenza Gustin sa sainta pertutgeida, è chegl angal per casualitad, ubetg!) leva malduvrar igl rumantsch scu essa da sagl giun Berna federala. Ma cun la mia ediziun cun aint maletgs tagleas or digl Coupé – deplorablamaintg mai realisada - sunga crudo an disfavour tar igl team da las PUNTS, uscheia tgi la mia carriera è fittada tar igl tetel da co-chauredactur da chella tscherta Fadrina gist menziunada; an verdad era la mia incumbensa da screiver concepts, far aint las curregias a mia schefa e far or cugl fier las sias sottschotgas. Per cletg eran chellas betg uscheia grondas, uscheia tgi la lavour sa tigniva an cunfegns.

Igl 2003 è en oter Rafael nia tiers la chauredacziun e la grondiosa idea da PUNTS on the Road è nascheida e neida realisada. Scu schofför digl PUNTSmobil vaia dastgea gialdeir la bela cumpagenia da puntist/as. Igl mies hailait persunal! Ma schon lò era vigl e moribund e la malsogna digl betgscrivendis ò antschet a piglier suramang da me. Mintga bustab era ena tortura e la mia fegn angal ple ena dumonda digl taimp.

Da stad digl 2004 vaia alloura piglia plangaplang cungedi da PUNTS e la mia mort vign ad esser stada igls 5 da december 2004. Las mias davosas ouras dastga passentar cò a Lavin an chest vörkschop per l’ediziun preschainta. E scu infurmaziun per te, tger lectour e bela lectoura, chegl èn las PUNTS numero 127, scretga e produtgeida an cumpagneia da dodesch puntist/as an la tgesa Filliana a Lavin. Onn vegl - onn nov è igl puntissimo da chesta ediziun, midadas igl sies cuntign ed an chest senn az deia gudbai e stet se leghers!

texts en questa ediziun

Laura Meng (Reclama)Gretta Bott (Amur)Fadrina Hofmann (Prominenza)Rafael Müller (Rumantsch)Ursin Lutz (Litteratura)Maurus Blumenthal (La profezia dallas profezias)Martin Cantieni - Gianna Sonder (Moda)Donat Caduff - Sina-Mara Hassler (Musica)Rafael Camenisch (Sport)Mevina Feuerstein (Scienza)Gianna Sonder (Nadal, son silvester ed en nov onn. Ed ossa?)Laura Meng (Il s-chazi da silvester)Mevina Feuerstein (Chi es silvester?)Gretta Bott (Experienzas da silvester)Fadrina Hoffmann (Silvester!!!)Ursin Lutz (Propiests pigns e gronds per igl onn niev)Maurus Blumenthal , Rafael Camenisch ("... sundel gie tuttina part da tei sco tut ils auters onns")PUNTS (Intervista cun Silvester)Sina-Mara Hassler (Tschincetgs: Igns dat, igns survean...)Marc Bundi (La seria meinsila da fotografias: Mathias Aeschlimann)

turnar a la survista