PUNTS
la gasetta giuvna

Detagls davart l'ediziun nr. 120

matg 2004
annada 10
10 onns PUNTS
PUNTS nr. 120
Caporedacziun: Gianna Sonder
Mevina Feuerstein
Ursin Lutz
Layout: Roman Schmid
editorial

10 onns PUNTS (Werner Carigiet)

Gia diesch onns - strusch da crair!

Dal temp da la fundaziun da las PUNTS la primavaira 1994 era la situaziun da la pressa rumantscha betg da cumparegliar cun quella dad oz. Era sche la Quotidiana è lura vegnida fundada mo in onn suenter las PUNTS, avess da quel temp nagin ristgà da siemiar d'ina gasetta surregiunala rumantscha. Tgi che s'engaschava per in tal product da pressa vegniva anc ris or sco extrem fantast.

Il mund da pressa rumantsch era dominà da titels regiunals sco la Gasetta Romontscha en Surselva, La Casa Paterna/La Pùnt en la Renania, la Pagina da Surmeir en il Grischun central ed il Fögl Ladin en l'Engiadina. Tradiziunalmain eran quests fegls entretschads en la politica regiunala, segnada per regla dal predomini d'ina partida politica e ragischadas en ina tradiziun confessiunala specifica da la regiun. Sguards sur ils cunfins da l'atgna regiun linguistica en il territori da l'acversari politic e confessiunal na devi strusch. Tge interess dueva il lectur da la Gasetta Romontscha, catolic ed aderent da la partida cristiandemocratica er avair da las novitads da l'Engiadina protestanta e fidaivla a la partida populara? N'eri betg plitost meglier d'impedir ad el questas invistas?

Il declin da tscherts products da pressa autonoms ils onns 1990 ha chaschunà vairs terratrembels en las regiuns pertutgadas. 'Esters' manavan tuttenina la batgetta en products che valivan sco garants solids sco granit ed atschal per la suveranitad e l'independenza politic-religiusa. Uschia è quai per sumeglia capità tar la Gasetta Romontscha. Il Fögl Ladin è schizunt svanì dal tut.

PUNTS era l'emprima gasetta rumantscha surregiunala e nus avain realisà ella! Ils 29 d'avrigl 1994 è cumparì l'emprim numer da PUNTS.

Fin il 1994 existivan duas gasettas da giuvenils rumantschas, fina alura er regiunalas, numnadamain La Talina en Surselva ed il Zundrign en Surmeir. Il Corv, che cumpariva in temp en l'Engiadina, era gia sparì ils onns 70. L'impuls inizial per la gasetta è naschì en il team da la Talina. Il 1993 è cumparì in numer communabel da Talina e Zundign. Suenter questa experienza è il project PUNTS vegnì mess sin via da la Giuventetgna Rumantscha (GiuRu) ch'era vegnida fundada pauc avant. Ina redacziun cun represchentants da tut las regiuns linguisticas è sa cumponida e curt temp. Da quest temp er jau chauredactur da la Talina ed hai pudì surprender il post da chauredactur da las PUNTS. Per nus collavuraturs en la redacziun era quest product ina vaira sfida. Il chauredactur era il schef administrativ e redacziunal. Dasperas devi anc trais caporedacturs ch'eran responsabels per las redacziuns da las singulas regiuns.

Igl era gia pulit grev d'organisar la producziun d'ina gasetta da l'atgna regiun. Organisar in team da giuvens schurnalists individualists era magari sco da dressar plugls. Administrar in manaschi sparpaglià per l'entira Svizra enturn era ina lavur immensa e jau ma smirvegl anc oz co quai ha adina funcziunà insaco. PUNTS era l'emprima product da pressa che publitgava en rumantsch grischun ed en ils tschintg idioms. Il secretariat era en Surselva, il layout vegniva fatg pli tard a Basilea, las sesidas da redacziun avevan lieu a Turitg e la stampa succedeva a Glion. E-mail na devi strusch da quel temp. Nus avevan bain experimentà in pau cun in sistem da transmissiun da datas, ma quai na funcziunava mai endretg. Uschia sutev'ins trasor spedir diskettas e palpiris per l'entira Svizra enturn: Il redactur las trametteva al caporedactur regiunal per il lectorat, il lez la spediva lura al post da layout e dal layout stueva tut vegnir transmess a la stampa. Sch'ins era tard vidlonder, sa resultavan magari custs respectabels per express, e betg darar capitavi ch'ins stueva halt purtar 'spert' ina disketta giu Turitg u Basilea cun il tren e lura puspè turnar en Surselva. Nossas sedutas da redacziun che avevan lieu en la pli gronda canera en il buffet da la staziun da Turitg han gia caracter legendar. Qua vegnivan lectorads texts, disputà davart cuntegns, critigà il layout, analisà e stratg dapart rubricas, fatg strategias per in product pli persvadent e sexy, planisà novs numers, tschertgà stories per nov primerurs e scandals. E lu stuev'ins anc guardar da cuntanscher il davos tren vers Cuira, Friburg, Basilea...

Tscherts fenomens che sa manifesteschan oz er tar la Quotidiana èn sa mussads er tar PUNTS. Per exempel avain er nus stuì constatar ina tscherta immunitad da l'Engiadina visavi ina identitad rumantscha surregiunala. Il dumber d'abunents en la val da l'En era er tar nus plitost discret...

Ed oz - diesch onn pli tard - poss jau constatar che las PUNTS ed il PUNTISTS giaudan ina sumeglianta vitalitad ed in sumegliant schlantsch sco ils emprims dis - er sch'i ha dà ina giada u l'autra temps burasclus. Talas fluctualiziuns tutgan dentant integralmain tar ina gasetta da giuventetgna. Ina gasetta da giuventetgna sto pudair far experiments empruvar e stgaffir novas chaussas, cun tut la ristga che quei porta. In redactur na resta (speranza) betg per vita duranta en la redacziun, uschia che cuntegn ed aspect varieschan adina puspè.

A las PUNTS dal segund decenni giavisch jau bler spiert, spiert avert e critic. In spiert che n'accepta e lagutta betg simplamain tut uschia sco ch'i vegn preschentà u sco ch'igl è. Ella duai esser ina gasetta che metta en dumonda e fa dumondas - er malempernaivlas. Ella sto sa stentar vinavant da surmuntar ils cunfins regiunals e regiunalists per lavura vi d'ina identitad rumantscha.

Jau sper ch'ils PUNTISTS sajan pronts da strair in u l'auter monument da miffa giu dal sochel, ch'els sviluppan e mantegnan en spiert che contribuescha a la creaziun d'ina nova societad grischuna e rumantscha. Qua datti davairas anc bleras PUNTS da construir.

texts en questa ediziun

Martin Cantieni (Dr Bus vo Chur, ina mesa scatla cigarettas ed in iglu) – Gianna Sonder)Thomas Candrian (Dallas Talinas allas PUNTS)Fadrina Hofmann (Eros - PUNTS es ün scandal!)Fadrina Hofmann (Intervista cun David Spinnler)Ursin Lutz (Tustget penderliu)Maurus Blumenthal (Intervesta cun Sergio Berger)Thomas Kaiser (Brückenschläge)Anita Simeon (Senza PUNTS? Mai!)Mevina Feuerstein (L'uniun dals Grischs festagia sieu anniversari da 100 ans!)David Truttmann (PUNTS è in luxus)Gian Sgier (Il pli geil ch'ins sa s'imaginar)Claudio Derungs (Il sgol)Samantha (Inamurà per ina notg)Pumaranza (Malcuntentientscha)Rafael Camenisch (Huara asilants)Arno Camenisch (Tuppa schnorra: Co gudignar in MTW Music Award)Rafael Müller (La moto: Dunnas sin töfs)Patrick Capaul (La band dal mais: Big Sugar)

turnar a la survista