PUNTS
la gasetta giuvna

Detagls davart l'ediziun nr. 110

fanadur 2003
annada 10
Open Air
PUNTS nr. 110
Caporedacziun: Pia Valär
Rafael Camenisch
Valentina Camous
Layout: Theres Jörger
Renate Jaberg
editorial

Open air (Curdin Fliri)

Zercladur, chaud, sulegl, stad, open air, open air ... Uschia funcziuna mes tscharvè a partir da quest mais. Avunda da concerts en stadions, avunda da viagiar da l’Engiadina fin giu la Bassa per tadlar dus uras musica e stuair puspè returnar.

Na, ils open airs èn schon in’invenziun fenomenala! Ina citad da tendas sa derasa sur tut il areal. En mintga chantun èsi savurinas dubiusas, fatschas estras simpaticas ed aventiras na betg anc raquintadas. Dapi il 1998 è il mund dad open airs ina part da mia vita. Las suandontas lingias èn or dal diari dad open airs da mai e mes collegs. Ina giada l’onn va tut mia clicca ad in open air. Quai è tradiziun e restarà tradiziun en l’avegnir:

4:50h. Mes vaschin ma sveglia cun pitgar vi da mia fanestra. Il chau martella anc da la saira avant. Quai na vess jau betg cret: durmir massa ditg al di da l’open air! Cun prescha stun jau si, ma tir en, rimn tut las bulschas, tastgas, mes crom e la tenda, sort sin via en la stgira bunura.

5:20h. Staziun: Pelvair manchentà l’emprim tren!

5:40h. Sala da spetga: L’emprim joint ed ina mustga che tenta.

8:20h. Ina partida freesbee a la staziun da Landquart. Baiver l’emprima biera durant ch’ellas èn anc fraidas. Il tren per Son Gagl è gia plain glieud cun bulschas e tendas. Nus fain sasez lieu en il cumpartiment.

10:15h. Las portas s’arvan pir las 12 :00h. Davant l’entrada principala èsi passa 1 km colonna. Dus collegs ed jau returnain tar la staziun per prender il bus tar l’autra entrada.

11:30h. Davant la segunda entrada para da sa mover insatge. Tuts crain che las portas hajan avert e cumenzan a smatgar. Fauss alarm.

12:00h. Ordvart punctual! Tut la glieud sta si e cumenza a smatgar. Ils mirs crodan. Ils terms vegnan miss per terra e tuts rampignan u siglian suravia. Pauc pli tard essans dadensvart e la festa po cumenzar.

12:20h. Nus vain chattà in lieu per las tendas ed al occupain immediat. La pausa gronda vaina merità.

19:39h. Las emprimas bands han cumenzà, las tendas stan, cumprà proviant per la saira èsi er. Il mument per giudair la musica è arrivà. Il pli tard qua serra giu tar mintga uman il tscharvè. Per trais dis exista per el be anc OPEN AIR. Nagina scola, navina lavur, nagins problems, naginas obligaziuns, be musica, collegs, festa, baiver, tschimar, giudair in auter mund che daventa real per quests paucs dis ...

Il team da PUNTS giavischa a tut ils giuvens e las giuvnas, a tut ils freaks da musica, a tut ils campers, a tut ils stars e na stars, a tut ils gronds e pitschens e natiralmain a tut ils puntists e las puntistas ina bella stad cun pauca plievgia e bler sulegl. E sa chapescha bun divertiment cun leger las PUNTS nr. 110 che rocka bod uschè dad aut sco in open air.

texts en questa ediziun

Dario Klaiss (Treis dis senza fuortga)David Spinnler (Il 19avel Open air Val Lumnezia: La festa taliana a Cuschnaus)Rafael Camenisch (Jau na poss betg metter Alcacyl en ils paunins)Curdin Friberg (La via ei liunga ...)Valentina Camous (En viva sen high faif)Christian Müller (Intervista cun Nguru - Ena gruppa gronda tgi è rastada modesta) (Tge è la chaussa la pli selvadia che ti has fatg ad in open air?)Fadrina Hofmann (Woodstock 1969)Gretta Bott (L’open Air Chapella in Engiadina)Pia Valär (La sgniffada dal Open Air la Punt)Roger Nigg (Jeu sai mo mussar a ti la porta - ir atras stos sez)Hildegard e Clotilda (Ava sobra e vatgas)Curdin Fliri (Film dal mais: 28 Days Later)

turnar a la survista