PUNTS
la gasetta giuvna

Detagls davart l'ediziun nr. 11

avrigl 1995
annada 1
Dunnas
PUNTS nr. 11
Caporedacziun: Anita Simeon
Gaudench Dazzi
Catrina Salis
editorial

Dapli dunnas che femnas! (Werner Carigiet)

La partida cristiandemocratica (PCD) da la Svizra ha scuvert in nov signet sin sia bandiera: la dunna. Co quella dunna da model vesa or è anc betg clar. Suenter il naufragi cun il spazi economic europeic, l’initziativa da las Alps, ils embrugls cun la NEAT; las turbulenzas blocherianas e la confruntaziun mulestusa verds e cotschens bandunan ils exponents dil bloc burghais il chauld palancà politic naziunal ed internaziunal per returnar en il chauld da lur famiglias e vulan trametter lur dunnas en las battaglias per prestisch, pussanza, daners e posts en cussegls administrativs.

In touch feminin en l’administraziun! Cun armas chemicas sco Nini Ricca e Gabriela Sabatini duai il slantsch dals adversaris politics vegnir paralisà? Lura bain!

Betg mo la PCD, ma er pliras autras partidas mettan grandas speranzas sin lur "jokeras". La finala èn ins el trend. Cun quai engaschi nuspetgà e quasi fanatic speran ins la finala da prender il slantsch a quellas dunnas feministas che s’angaschan gia dapi onns e decennis per ina quota da dunnas en parlaments ed adminitraziuns. Nua finiss er quai! Na, na!

Ins ha encuri en las atgnas retschas ed ha stuì constatar cun sgarschur quant paucas dunnas ch’ins ha dà la pussaivladad da seprofilar fin uss! – E cun quai ha la tschertga desperada e la construcziun da persunas profiladas antschet!

Gist quella recrutaziun da prescha è remarcabel. Ins fa quint cun ina infrastructura che n’exista anc betg. Ina chaussa è clara: en mintga cass vegni en in onn a dar dapli dunnas en parlaments ed administraziuns. Er en il Chantun Grischun san in registrar empremas emprovas desperadas en questa direcziun. Mo è quai la suletta finamira? Betg clara è en mintga cass la damonda quant qualifitgadas che quellas dunnas èn che vegnan quasi "tschitschadas ord la detta" dals presidents da partida. Ma nauschas buccas pretendan ch’er la recrutaziun da umens per uffizis ed onurs succedia tuttina nunorganisadamain e casualmain. Quai vul dentant anc betg dir che tu las dunnas en la politica sajan flaivlas. In fatg è dentant che bleras carrieras da dunnas è vegnidas destruidas dal sistem politic perquai ch’ellas na mavan betg a prà cun il mund viril da la politica. Jau sper che gist quellas dunnas survegnian oz la chaschun da vegnir elegidas gist perquai ch’ellas èn autras. Clar è quai anc ditg betg! Lain sperar il meglier per la politica e per la chaussa da las dunnas, che avessan gia daditg merità ina represchentanza pli gista betg mo da la populaziun, ma er da las ideas.

texts en questa ediziun

Anita Capaul (Emanzipaziun dalla dunna: gia caffè vegl?)Werner Carigiet (Quant valan las dunnas rumantschas?)Catrina Salis (100 oons scolaziùn da dunas – 100 ons scola da dunas)Jacqueline Stgier (Donnas an acziun – donnas an prievel)David Spinnler (Emanzipaziun o sexissem sech?)Toni Poltera (Janis Joplin, ena donna sainza cunfegns)Anita Simeon (Las donnas digls 20 da fanadour)Gauadench Dazzi (Dodici lettere d’amore – la nouva CD da Pippo Pollina)Pia Plaz (Crappa ed ava) (PUNTS Profil cun Guido Lazzarini)Anita Capaul (Giuventetgna dismetta cunfins)Isabelle Jaeger (Il nas plain?)

turnar a la survista