PUNTS
la gasetta giuvna

Detagls davart l'ediziun nr. 103

december 2002
annada 9
Famiglia
PUNTS nr. 103
Caporedacziun: Pia Valär
Rafael Camenisch
Valentina Camous
Layout: Theres Jörger
editorial

Tge è famiglia? (Pia Valär)

"Sche jau turn la sonda saira tard a chasa dad ina cursa u dad in champ da trenament e ma dasd en dumengia bunura ed aud mes frars, mia mamma e mes bap, lura stun jau si er sche jau sun anc stanchel mort. Jau stun si be per mangiar ensolver cun els. Quel mument da tarschola cun blera, blera Nutella sisura e da vesair sunter ditg puspè quellas quatter fatschas …, quai è mia famiglia!", disch Rafael Ratti da Madulain, curridur da passlung e gimnasiast.

Per blera glieud giuvna è la famiglia in lieu. In lieu senza coordinatas fixas, in lieu tgi sa rechatta savens precis là, nua che s’accumuleschan ils medems gens. En quest lieu sa chatta segirezza, fidanza, chalur ed amur. In lieu protegì nua ch’ins sa po adina turnar: la famiglia che è qua sch’ins la duvra.

Natiralmain n’è il pled "famiglia" betg gia granzia per tut quai. Famiglia sa numnadamain er signifitgar "conflicts". Conflicts banals sco quels che il frar secca la sor e rumpa il chastè da blokins ch’ella ha fabritgà, u il conflict nua ch’il teenager è permalà perquai che ils geniturs na al vulessan betg laschar ir en sortida. In auter exempel èn ils conflicts tranter geniturs – conflicts che pon finir cun in divorzi.

Ma tar la famiglia na tutgan betg be geniturs e fragliuns mabain er nonas e nons, tantas e barbas, cusdrinas e cusdrins, chauns e giats eav. Uschia sa la famiglia er esser ina rait sociala: la nona guarda dals uffants intant che ils geniturs èn a kino u en vacanzas. La vestgadira dals cusdrins pli vegls rivan a la fin en la laschiva dals cusdrins pli giuvens.

Famiglia: In grond pled, che n’exista betg be da persunas, ma er da lieus nua ch’ins sasenta dachasa e che cuntegna surtut er sentiments. Chara lectura, char lectur, PUNTS (ina gasetta tgi cuntegna persunas, dachasa ed or avant tut er sentiments!) duai esser ina distracziun da tia famiglia entant che ti la legias. Bun divertiment!

texts en questa ediziun

Barbla Etter (tscherchafamiglia.com)Rafael Camenisch (Nua è noss char frar?)Fadrina Hofmann (Racolta da maila)Robert Buchli (Famiglia moderna?)Eveline Nay (Moscau e ses affons negligi)Hildegard versus Clotilda (Hildegard - Clotilda)Dario Klaiss (Jeu lasch encrescher)Rafael Müller (Papi ha in nas da cocs)Patrick Capaul (La schibetta dal mais: Born A Lion)Curdin Fliri (Il film dal mais: One Hour Photo)

turnar a la survista